Don Bosco Comoro harii kuartu ba vítima dezastre iha resintu sentru ne’e. Imajen/Espesiál

DILI, 16 outubru 2021 (TATOLI)—Vítima inundasaun, Maria de Jesus Ximenes, agradese ba Sentru Formasaun Don Bosco (CFDB, sigla portugés) tanba fó atendimentu di’ak ba sira no oferese espasu hodi kuda modo, nune’e bele sustenta moris loron-loron.

Inundasaun ne’ebé akontese iha loron 04 abríl, halo uma hamutuk 4.231 iha territóriu tomak mak hetan estragu totál, obrigadu vítima sira tenke hela provizóriu iha sentru akollimentu estabelesidu.

“Ami kontente tebes tanba durante ami hela iha ne’e, ami susar hetan osan, maibé Don Bosco laran ruak bele oferese kintál oituan ba ami hodi kuda modo, hodi han no fa’an hodi sustenta moris, ita haree ba nesesidade uma-laran nian,” Maria de Jesus hateten ba Agência TATOLI, iha Don Bosco Comoro, sábadu ne’e.

Notísia relevante: Lona sai mahon ba vítima inundasaun iha Manleuana hahú nakles

Vítima inundasaun ne’ebé daudaun hela iha Don Bosco Comoro hamutuk ema na’in-152, hosi uma-kain 35.

Kona-ba ba apoiu hahan, kada uma-kain iha sentru ne’e hetan foos saka ida hosi Governu.

“Ita-nia Governu apoiu nafatin, maibé foos de’it, ami iha ne’e Amu sira iha Don Bosco  mak kada semana apoiu modo sira ba ami, ne’ebé ba han hemu ami senti di’ak,” nia nia akresenta.

Husu Governu foti desizaun ba opsaun hela fatin

Durante fulan-neen nia laran ona vítima dezastre naturál hela iha sentru akollimentu sira, tanba ne’e sira husu Governu aselera foti desizaun hela fatin.

“Governu antes ne’e mai no fó opsaun tolu ba ami hanesan fila bá munisípiu, hein Governu buka fatin própriu no opsaun seluk mak ami-nia fatin ne’ebé akontese inundasaun ne’e, Governu ba haree no posibilidade bele hadi’a, hodi ami bele fila ba hela, tanba ne’e ami hakarak Governu bele foti desizaun lalais ba opsaun tolu, tanba ami iha ne’e di’ak, maibé lona ne’e ami la tahan to’o tempu rai manas tebes no tauk akontese tan tan udan boot ruma,” nia akresenta.

Aleinde ne’e, Don Bosco harii kuartu provizóriu hamutuk 20 iha resintu sentru ne’e, ba vítima dezastre naturál, ne’ebé kada uma-kain ida hetan kuartu ida, enkuantu seluk kontinua iha lona hodi hein desizaun hosi Governu.

Notísia relevante: Governu planeia tau vítima inundasaun iha alojamentu temporáriu

Enkuantu kona-ba bee-moos, sanitária, saúde públika, abitante iha sentru ne’e konfesa katak laiha problema, tanba Don Bosco prepara hotu kondisaun ba vítima sira no ba parte saúde, pesoál saúde kada semana nafatin halo atendementu ba abitante sira.

Iha biban hanesan, Responsável Sentru akollimentu Don Bosco Comoro, Irmão, Adriano Maria de Jesus, hateten, parte sentru nafatin esforsu maibé husu mós Governu bele tau-matan no rezolve problema ne’ebé abitante sentru ne’e enfrenta.

Aleinde ne’e, vítima inundasaun uma-kain haat ne’ebé durante ne’e okupadu sala eskola rua iha Eskola UNAMET 04 setembru Balide, filafali ona ba sira-nia hela fatin, iha semana rua liubá.

“Jerente eskola konsege konvense uma-kain haat hodi fila ba sira-nia hela fatin no ikus mai entrega sala rua ne’e ba fali eskola,” Diretór Eskola, Sergio Alfreo da Cruz, hateten.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here