Diretór Ezekutivu no Prezidente Arkivu no Muzeu Rezisténsia Timorense (AMRT), Hamar Antóninho Baptista Alves. Imajen TATOLI/Natalino Belo

BAUCAU, 16 outubru 2021 (TATOLI)–Diretór Ezekutivu no Prezidente Arkivu no Muzeu Rezisténsia Timorense (AMRT), Hamar Antóninho Baptista Alves, hateten, iha ona planu konstrusaun jardín ‘Chamada da Eterna’, hanesan jardín istóriku ne’ebé bele atrai vizitante no hatama reseita ba Estadu.

“Jardín ne’e agora iha Muzeu ninia oin, bele dehan tinan ida ho balun ona ita bele finaliza ona ninia konstrusaun,” Prezidente AMRT hateten iha suku Ossoala, postu administrativu Vemasse, munisípiu Baucau, sábadu ne’e.

Tuir planu, konstrusaun sei hahú iha tinan 2022 no finaliza iha tinan 2023, ho kustu purvolta millaun $5.

Aleinde ne’e, iha planu konstrusaun jardín iha munisípiu seluk, maibé sei iha faze koordenasaun ho veteranu sira tanba autór mak veteranu.

Bainhira entidade relevante hamutuk no koopera ho AMRT, bele konstrui jardín hodi transforma ba aspeitu ne’ebé dignu atu atrai vizitante hanesan turizmu istóriku.

“Kualker jaridín ne’ebé importante ita urbaniza tuir forma hotu, atu nune’e iha reseita, labele halo investimentu kuandu laiha reseita,” Hamar akresenta.

Iha mós planu konstrusaun jardín ida iha Loilacu, munisípiu Manatuto, ne’ebé iha ona faze finál halo dezeñu detallu tékniku enjiñaria, ne’ebé tuir planu konstrusaun hahú tinan 2022 no sei ramata iha tinan tuir mai.

Notísia relevante: Kaixa Sadere entrega dokumentu rezisténsia ba AMRT

Tuir rekomendasaun hosi responsável kaixa sira, iha fatin balun sai mós fatin masakre, tanba ne’e AMRT sei halo levantamentu dadus tékniku atu kria jardín hodi dignifika fatin hirak ne’e no valoriza sai fatin istóriku, ne’ebé bele konvida sidadaun sira mai vizita.

“Espasu ne’e hanesan fatin istóriku ba futuru no bele garante vizitante atu vizita, no jardín sira ne’e kria kondisaun atu iha retornu ba Estadu Timor-Leste iha tempu naruk,” Diretór Ezekutivu AMRT katak.

Durante rekolla dokumentu hosi veteranu no responsável kaixa, hasoru dezafiu desde inísiu iha tinan 2002 to’o ohin loron, ne’ebé maioria dokumentu hosi rejiaun kuatru, tres no iha dois foin ba daruak iha Ossoala, postu Vemasse no dahuluk iha kaixa garuda.

Objetivu hosi atividade mak atu buka hakbesik-an ba responsável hotu atu rekolla dadus, tanba konsidera importante atu prezerva ba istória Timor-Leste, nune’e bele sai útil iha futuru ba jerasaun foun sira.

To’o ohin loron, AMRT konsege rekolla no dijitaliza dadus hamutuk 16.000, ne’ebé públika online no 5.000-resin mak sei iha prosesu klasifikasaun.

Jornalista : Natalino Belo

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here