Vise-Ministru Edukasaun, Juventude no Desportu, António Guterres, esplika ba abitante aldeia Dais kona-ba importánsia vasina, iha aldeia Dais, sábadu (16/10). Imajen TATOLI/Celestina Teles

COVALIMA  16 outubru 2021 (TATOLI)–Abitante aldeia Dais, suku Belekasak, postu administrativu Maucatar, munisípiu Covalima, antuziasmu simu vasina hafoin rona esplikasaun  hosi Vise-Ministru Edukasaun, Juventude no Desportu, António Guterres, kona-ba  importánsia vasina iha ámbitu pandemia. 

“Ita-bo’ot sira iha aldeia Dais besik estrada, ha’u mai tanba preokupa ho ita-bo’ot sira-nia saúde. Tanba ne’e, inan-aman sira tenke vasina hodi salva ita-nia an no família,” Vise-Ministru hateten iha kampaña vasinasaun iha aldeia Dais, sábadu ne’e.

Governante ne’e nota no apresia ho votande komunidade aldeia ne’e, tanba bele pasa informasaun ba malu hodi hakat ba sentru saúde no simu vasina.

“Ha’u-nia prezensa semana-rua ho ekipa saúde sira ikus, maibé taxa kobertura atinje ona 82,4%. Tanba ne’e, apela nafatin ba ita-bo’ot sira atu labele rona informasaun falsu iha li’ur,” nia akresenta.

Notísia relevante: Covalima okupa fatin dahuluk progresu vasinasaun atinje 82,4%

Nune’e, Vise-Ministru husu ba komunidade atu serisu hamutuk ho líder komunitáriu sira, atu nune’e aldeia Dais bele livre hosi COVID-19. 

Iha sorin seluk, Responsável kampaña vasinasaun Covalima, Alípio Gusmão Lopes , apresia tanba komunidade iha ona konsiénsia atu hakat ba sentru saúde simu vasina.

“Ha’u kontente ho komunidade tanba ulun mamar atu simu vasina, tanba membru Governu sira ba iha munisípiu Ermera ninia taxa kobertura vasinasaun ladun iha mudansa, maibé Covalima nia taxa kobertura iha mudansa,” Alípio dehan. 

Nia mós konsidera vasina mós importante atubele fila ba normalidade foun.

“Dadus hosi  saúde hatudu katak sidadaun ne’ebé lakon vida  tanba  COVID-19  hamutuk na’in-119 no hosi númeru ne’e, na’in-111 maka lá vasina, enkuantu restu simu vasina doze dahuluk no balun de’it mak kompletu. Tanba ne’e, tenke vasina atu projete abitante Covalima ne’ebé mate tanba COVID-19 hosi postu administrativu Fatumea, Maucatar no Fohorem,” nia informa. 

Tuir observasaun jornalista iha terrenu, nota katak ho prezensa Vise-Ministru António Guterres, iha abitante kuaze 100 iha aldeia Dais maka rejista naran iha pesoál saúde atu simu vasina ba doze dahuluk. 

To’o loron 15 outubru, rejista ema hamutuk 46.092 (82,4%) mak simu ona vasina, hosi doze vasina 64.414 ne’ebé distribui ona iha Administrasaun Covalima.

Enkuantu, iha territóriu tomak, rejista ona ema 504.194 (66,8%) mak simu ona vasina doze dahuluk no ema 322.439 (42,7%) mak simu ona vasina doze daruak, ho totál kobertura 826.634.

Jornalista : Celestina Teles

Editora     : Julia Chatarina 

PUBLISIDADEiklan

HAKEREK NO HATÁN

Please enter your comment!
Please enter your name here