Responsavel Kaixa Unidade Alfa 7 iha Ossuala, Luis Jose Perreira. Imajen Tatoli/Nelson de Sousa.

BAUCAU, 15 outubru 2021 (TATOLI)—Iha tempu okupasaun Indonézia halibur malu harii kaixa klandestina Alfa 7 atu apoiu Falintil sira iha ai-laran, maibé iha ámbitu ukun rasik an ne’e sira halibur malu fali hodi kria koperativa iha área natar no to’os nian atu halo negósiu no fó apoiu ba membru koperativa sira bainhira presiza.

Notísia Relevante: Responsável kaixa Alfa 7 fó sasin involvimentu luta rezisténsia ba AMRT

“Koperativa ne’e membru 20-resin no ami hahú kleur ona. To’o agora, koperariva halai liu ba área natar no to’os, hodi servisu hamutuk. Hanesan iha natar no toos hodi kuda haree no batar bainhira nia rezultadu ikuus mak faan fila-fali foos no batar ne’e,” Responsavel kaixa Unidade Alfa 7 Luis José Perreira, hateten ba Agência Tatoli iha suku Ossouala, postu administrativu Vemasse, munisípiu Baucau, sesta ne’e.

Rezultadu hosi koperativa ne’e, nia informa, durante ne’e Kompañia Acelda mak mai sosa produtu sira hanesan haree kulit no batar no kada tinan bele hetan rendimentu $600-resin.

Aleinde ne’e, nia dehan, produsaun foos no batar koperativa nian ne’e bainhira iha membru   balun presiza ka hasoru lia-mate no ko’alia kultura ruma karik, bele distribui fila-fali hodi fó apoiu ba membru ne’ebé presiza tulun.

Kaixa Alfa 7, mós iha ona inisiativa seluk hodi haluan atividade kooperativa ba área seluk hodi haki’ak animál hanesan fahi no karau, tanba Ossouala iha potensia ba setór pekuária nian.

“Faze inisia hela. Hanoin atu hahú kria fatin luhan ba haki’ak animál iha tempu tuir mai,” nia dehan.

Responsável ne’e hateten, sei hato’o pedidu ba Sekretária Estadu Kooperativa (SECoop, sigla portugés) bele vizita kooperativa ne’e, tanba membru koperativa sira presiza tuir formasaun atu kapasita an no bainhira iha fundu ruma bele dezenvolve koperativa ne’e sai di’ak liután.

“Husu ba SECoop oinsa bele tau matan ba kaixa rezisténsia ne’ebé harii iha tempu defisíl oinsa mak dezenvolve an iha vida moris iha grupu koperativa nian,” nia dehan.

Husu Governu lori dezenvolvimentu hakbesik ba Ossouola

Responsável kaixa Unidade Alfa 7, Luis José Perreira, iha esperansa ba dezenvolvimentu atu Governu tau atensaun ba Ossouala tanba luta durante tinan 24 nia laran, suku Ossouala  hanesan zona mean (garis merah)  iha tempu okupasaun no mós hanesan fatin ba gerilleiru Falintil sira.

“Maibé, Timor-Leste ukun an besik tinan 20 ona maibé ami suku ida-ne’e seida’uk asesu eletrisidade, estrada sei aat no susar asesu bee-moos. Tanba ne’e, husu Governu atu tau atensaun no lori hakbesik dezenvolvimentu mai suku Osouala,” nia hateten.

Suku Ossuola, postu administrativu Vemase, munisípiu Baucau, iha aldeia lima mak hanesan Caidenulale, Hoineuwai, Lolinunu, Waiknasa, no Umaiku ho totál populasaun hamutuk 2339 no xehe família 503 ho maiória populasaun moris nu’udar vida agrikultór.

Suku ne’e iha potensialidade ba natar, pekuária hodi haki’ak animál inklui produtu lokál sira hanesan modo no ai-fuan sira seluk.

Jornalista : Nelson de Sousa

Editór       : Cançio Ximenes  

 

PUBLISIDADEiklan

HAKEREK NO HATÁN

Please enter your comment!
Please enter your name here