Prezidente Autoridade RAEOA, Arsénio Paixão Bano, halo fiskalizasaun ba projtu perfurasaun sistema bee-moos, iha suku Lela-Ufe, sub-rejiaun Nítibe. Imajen/mídia RAEOA.

OÉ-CUSSE, 15 outubru 2021 (TATOLI)— Projetu perfurasaun sistema bee-moos iha bairru Noa-Ana, suku Lela-Ufe, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA), gasta montante orsamentu $494,729.59.

Notísia relevante: Konstrusaun perfurasaun bee-moos iha Noa-Ana atinje ona 21%

Prezidente Autoridade RAEOA), Arsénio Paixão Bano, hamutuk ho ekipa tékniku hosi Diresaun Rejionál Infraestrutura (DRI), kinta horisehik halo ona fiskalizasaun ba projetu refere no progresu fíziku atinje ona porsentu 75.

“Konstrusaun perfurasaun ne’e atinje ona 75%, entaun tuir planu hosi tékniku sira katak iha inísiu fulan-novembru ne’e, ita bele halo ona inaugurasaun, hodi entrega ba komunidade sira iha Lela-Ufe atu uza ona tanba nia servisu fíziku besik termina ona,” Arsénio Paixão Bano, informa ba Agência TATOLI, iha Oé-Cusse, sesta ne’e.

Purtantu, Diretór empreza Am-Lhichoe, Eurico da Rosa, informa, bee-moos hetan ona no serbisu fíziku besik konklui ona, daudaun ne’e sei presiza de’it hatama ahi eletrisidade nune’e bele halo ona pumping text hodi halo koneksaun ba tanki sira.

Xefe suku Lela-Ufe, José Neno Sila, agradese ba autoridade RAEOA tanba planu prioridade setór água no saneamentu, suku Lela-Ufe hetan perfurasaun sistema bee-moos nune’e bele fó moris ba populasaun iha suku refere.

“Projetu perfurasaun ne’e sei fó benefísiu ba populasaun iha bairru tolu iha aldeia Mahata, Kuat-Enas, Nefolete no Mahata ho totál populasaun hamutuk 1.074,” nia agradese.

Entretantu, projetu konstrusaun perfurasaun sistema bee-moos ne’e konstrui iha bairru Noa-Ana, aldeia Mahata, ezekuta hosi empreza Am-Lhichoe Unipesoál, Lda, ho valór kontratu hamutuk $494,727.59.

Notísia relevante: Arsenio Bano: “Ha’u-nia prioridade hakarak rezolve problema bee-moos iha Oé-Cusse”

Jornalista: Abílio Elo Nini
Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here