Sekretária Estadu Igualdade no Inkluzaun, Maria da Fonseca de Jesus, vizita hela feira ne’ebé hatudu hosi feto sira iha postu suku Miligo, postu administrativu Cailaco, munisípiu Bobonaro. Imajen Agência TATOLI/Sério da Cruz.

BOBONARO,15 outubro 2021TATOLI –  Governu liuhosi Sekretaria Estadu Igualdade no Inkluzaun (SEII), komemora loron internasionál feto rurál 2021 ho feira produtu lokál iha suku Miligo, postu administrativu Cailaco, munisípiu Bobonaro.

Komemorasaun loron internasionál feto rtinan 2021 nian ho tema “Dezenvolve feto rurál atu asegura ai-hán di’ak ba ema hotu”. Iha selebrasaun ne’e mós feto sira halo aprezentasaun produtu liuhosi feira produtu lokál.

Sekretária Estadu Igualdade no Inkluzaun, Maria da Fonseca de Jesus, hateten feto rurál sai komponenti importante tebes iha prosesu dezenvolvimentu nasionál, tanba feto sira kontinua luta maka’as ba familia nia moris di’ak, luta ona sira-nia edukasaun, saúde no envolvimentu iha setór agrikultura, maibé nafatin enfrenta difikuldade.

Governante ne’e sibliña, komemorasaun ne’e atu rekoñese no valoriza papél feto sira iha área rurál, liuhosi kreatividade no protudu ne’ebé sira produz nune’e iha futuru bele kontribui ba moris di’ak iha uma laran, hodi redús pobreza iha Timor-leste.

“Ita hakarak hasae ema-nia konsiénsia kona-ba luta maluk feto sira-nia iha área rural no hasa’e ema-nia konsiénsia kona-ba nesesidade ne’ebé sira iha hanesan ho maluk feto sira iha área urbana, nune’e bele hasa’e entidade oinoin nia konsiensia, atu asegura katak ho kna’ar oinoin ne’ebé ita halo bele responde ba sira-nia prekupasaun,” Governante hato’o asuntu ne’e ámbitu selebrasaun loron internasionál feto rurál, iha Cailaco, sesta ne’e.

Nia dehan, feto rurál iha direitu asesu ba merkadu ho seguru no fa’an sira-nia produtu, nune’e mós iha direitu asesu ba estrada, saúde no eletrisidade, maibé realidade seidauk iha tratamentu di’ak.

“Governu iha responsablidade atu fasilita sira no kria kondisaun ba sira nune’e bele asesu ba iha teknolojia inovasaun uza métodu oinoin, ne’ebé bele ajuda sira hodi kria kualidade no kuantidade produsaun ai-hán di’ak ba familia uma-laran,” nia katak.

Iha fatin hanesan, Administradór Postu Administrativu Cailaco, Alfredo Meta, agradese ba governu tanba bele hili  Cailaco sai hanesan fatin realizasaun loron internasionál feto rurál ne’e.

“Ha’u kontente tebes tanba liuhosi prezensa ita-nia na’in ulun sira bele identifika problema ne’ebé durante ita-nia inan feto rurál sira hasoru, espera ba oin sira bele responde prekopasaun hirak ne’e,” nia akresenta.

Entretantu reprezenta feto hosi aldeia Liabote suku Miligo, Maria Borges, kontente tanba bele hetan oportunidade partisipa iha selebrasaun loron importante feto rurál ne’e.

“Ami agradese tanba liu hosi komemorasaun ida ne’e ami bele hato’o ami nia difikuldade direita ba na’in ulun sira atu buka dalan no haforsa ami-nia negosiu kiik,” nia orgullu.

Maske nune’e, nia husu ba órgaun kompepente atu tau kestaun ne’e iha prátika, tanba durante sira-nia grupu eziste seidauk hetan apoia finanseira hosi governu.

“Ami-nia hakarak mak ne’e, labele mai ko’alia no promete de’it, presiza liu mak tau atensaun ba ami ne’ebé hela liu iha foho ninin, ami bele halo buat oioin maibé laiha kondisaun entaun susar ami atu hetan osan,” reprezentante feto ne’e fó hanoin SEII.

Tuir observasaun Agência TATOLI, iha selebrasaun ne’e selebra ho atividade feira hanesan mina nú virjen, talas, fehuk ai-farina sona, hudi, akar tunu no seluk tan.

Enkuantu produtu artezenatu nian mak hanesan tais, pasta uza tais, bote, luhu, lafatik no produtu sira seluk ne’ebé diversifika ona ho produtu modernu sira hansan, fore-rai sona ho trigu no seluk tán.

Jornalista         : Sérgio da Cruz

Editor               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here