Vise-MEJD akompaña komunidade Bernardino Mendonça konta esperiénsia kona-ba importánsia hosi vasina. Imajen Tatoli/Celestina Teles.

COVALIMA  15   Outubru 2021 (TATOLI)—Reprezentante Administradór Postu Administrativu Maucatar, António Marçal, informa komunidade postu administrativu Maucatar falta de’it 15% mak seidauk simu vasina.

“Ha’u atu relata, dadus jeral iha postu administrativu Maucatar ne’e, komunidade hela de’it 15% mak seidauk vasina,” António Marçal hateten liuhosi diskursu bainhira hamutuk ho Vise-Ministru Edukasaun Juventude no Desportu, António Guterres, iha kampañia Vasinasaun ne’ebé realiza iha suku Belekasak, aldeia Lolowa, Maucatar, sesta ne’e.

Nia enkoraja komunidade, funsionáriu no joven sira iha postu administrativu Maucatar kompostu hosi suku Matai, Ogues no suku Holpilat no Belekasak ne’ebé númeru vasinasaun menus liu, husu komunidade atu hakat ba sentru saúde simu vasina no lalika tauk.

Vise Ministru Edukasaun ne’e hateten, membru Governu nia prezensa la’ós atu obrigada komunidade atu simu vasina maibé atu fó hanoin ba komunidade hodi disemina informasaun kona-ba importansia hosi vasina ne’e.

“Aldeia Lolowa, inan-aman sira tenke hateten ba an rasik katak ami-nia aldeia lakoi moris ho COVID-19 maibé hakarak livre hosi COVID19-19, nune’e livre hala’o movimentu ba-mai,” nia dehan.

Iha observasaun nota katak ho prezensa Vise Munistru MEJD komunidade aldeia lolowa antuziasmu simu vasina tanba ema na’in-41 mak konsege simu vasina iha biban ne’e.

Responsavel Kampaña Vasinasaun Covalima, Alípio Gusmão Lopes, klarifika postu administrativu Maucatar komunidade falta de’it 15% mak seidauk simu vasina, maibé kobertura vasinasaun ne’e, Covalima okupa primeiru lugar.

“Kobertura vasinasaun, Cvalima okupa primeiru lugar tanba kontribuisaun hosi ita-bo’ot sira ni’an. Se la hetan kontribuisaun hosi ita-boot sira, mak ita-nia dezenvolvimentu sei la’o hakdasak no la la’o. Maibé, Covalima kontribui ona planu hosi Governu nian tanba antes ne’e Covalima  okupa númeruu segundu no  terseiru, maibé agora okupa primeriu lugar,” Alípio  esplika.

Kobertura vasinasaun munisípiu Covalima iha nivel nasionál, Covalima okupa primeiru lugar vasina doze dahuluk 80,4% no ba doze daruak okupa segunda lugar 51,8%.

Entretantu komunidade ne’ebé simu ona vasina, Castro Leto, enkoraja komunidade hodi fó sasin katak simu vasina ne’e la’ós aumenta de’it ema-nia imunidade maibé vasina mós bele kura moras komplikadu.

“Ha’u hakarak konta ha’u-nia esperiénsia. Antes-ne’e, ha’u moras tensaun no konsulta to’o ona Hospital Nasionál Guido Valadares la konsege kura. Ha’u fila mai iha de’it uma. Ha’u-nia oan sira haruka ha’u labele simu vasina. Maibé, ha’u rasik deside ba simu vasina. To’o ikus mai, ha’u nia moras tensaun rekopera,” Castro Leto haktuir nia esperiénsia.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here