Dirasaun Rejionál Asuntu Agrikultura liuhosi Departementu Floresta, daudaun ne’e prepara ona ai-oan hamutuk rihun 50 atu kuda iha área protejida. Imajen TATOLI/Abílio Elo Nini.

COVALIMA, 15 outubru 2021 (TATOLI)—Xefe Departamentu Reprezentasaun Territoriál Floresta no Planta Indústria Covalima, Francisco Sarmento, informa Floresta Covalima seidauk  bele  atende pedidu hosi komunidade no Organizasaun Naun Governamentál (ONG) sira atu distribui ai-oan tanba ai-oan seidauk preparadu.

Notísia Relevante: Floresta Covalima prioridade programa viveiru komunitária

Xefe Departamentu Reprezentasaun Territoriál Floresta no Planta Indústria Covalima, Francisco Sarmento. Imajen Tatoli/Celestina Teles.

“Ami seidauk bele autoriza komunidade no ONG sira haruka pedidu mai tanba ai-oan seidauk preparadu. Bainhara dezenvolve viveiru komunitária prontu ona. ami sei fahe informasaun ba líder komunitária sira hodi fahe tutan informasaun ba komunidade no ONG sira,” Francisco Sarmento informa ba Agência Tatoli, iha Santa Rosa, Covalima, sesta ne’e. 

Programa Floresta Viveiru Komunitária, oras ne’e daudaun sei iha prosesu prenxe hela rai ba poliback (plastiku) preparasaun ba iha kompos (adubu) rai-metan atu kuda ai-oan no hein ekipamentu hanesan mangeira, tekniku floresta atu dezenvolve di’ak liután hodi distribui ai-oan ba iha komunidade.

Ninia kritériu mak tenke besik estrada no dezenvolve iha postu alvu sira atu fasilita agrikultura fasil atu foti ai-oan. 

Programa Viveiro Komunitária Floresta Covalima implementa iha postu administrativu Fatumea, Fatululik,  Maucatar,  Suai Vila no Zumalai, aloka  orsamentu ba programa viveiru komunitária bazea ba etapa agora no iha faze dahuluk $700 hodi dezenvolve fatin. 

Floresta Covalima, surante ne’e kuda ai-oan sira hanesan mahoni, samtuku, ai-kakeu, ai-ná, sabraka no seluk tán. 

Nia informa, Floresta Covalima distribui ai-oan sira bazea ba pedidu hosi ONG, no to’os-na’in sira no guarda floresta sira identifika rai-ne’ebè to’os na’in sira atu kuda hafoin halo kalkulasaun ai atu distribui. 

“Ami distribui ai-oan bazea pedidu no la obriga to’os na’in sira. Bazea ba esperiésia ne’ebè iha, to’os-na’in balun kuda ai-oan la kuidadu no ai-oan la moris tanba la kontrola,” nia dehan. 

Oras ne’e daudaun, estoke ai-oan samtuku ho kakeu mak preparadu iha postu administrativu Suai Vila hamutuk 15.000.00, ai mahoni no sira seluk iha maibè foin iha faze preparasaun. 

Jornalista : Celestina Teles

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here