DILI, 14 outobru 2021 (TATOLI)— Arsebispu Arkedioseze Metropolitana Dili, Don Virgílio do Carmo da Silva, sente orgullu Laureadu Prémiu Nobel ba Pás, José Ramos Horta, ne’ebé kontinua promove Timor-Leste ba Mundu.
“Ha’u sente orgullu maka ita nasaun kiik ida, maibé ita mós iha ema hanesan Ramos Horta hodi kontribui ko’alia kona-ba preokupasaun mundu nian, liuliu buka dalan atubele mundu bele apoia ba nasaun frázil sira,” Don Virgílio hateten, iha iha Kuarte Jerál PNTL,Caicoli, Kinta ne’e.
Eis Prezidente Repúblika José Ramos Horta, halo enkontru formál ho Santo Padre Francisco iha Basílica São Pedro, Vaticano tanba sai ekipa júri ba prémiu Zayed ba Fraternidade Umana.
Alende ne’e, Horta mós promove kafé Timór no husu atu Papa Francisco, hemu de’it kafé Timór.
“Esforsu ne’ebé Ramos Horta halo, parte ida atu promove nasaun ki’ik hanesan Timor-Leste iha mundu. Nune’e sente orgullu tanba nasaun kiik, maibé ita nia ema hola parte iha komisaun boot hodi kontribui pás iha mundu,” Arsebispu kongratula.
Jornalista: Natalino Costa
Editór: Florencio Miranda Ximenes