CDTL

DILI, 15 outubru 2021 (TATOLI)- Konfederasaun Desportiva Timor-Leste (CDTL,sigla portugés) hahú kordena malu realiza assembleia jerál hodi hili esturutura foun tanba estrutura atuáL nian mandatu  ramata iha 07 marsu 2021.

Prezidente Komisaun Organizadora Assembleia Jerál, Aniceto Berlele, hateten, Assembleia jerál ne’e realiza ho baze ba Estatutu CDTL, artigu 40, alina 1, kada tinan haat tenke halo kongresu hodi hili estrutura foun hodi lidera instituisaun.

“CDTL koordena hala’o assemblea jerál iha 20 novembru tinan ne’e hodi hili Prezidente no estrutura foun. Loloos hala’o iha marsu liuba, maibé situasaun pandemia Covid-19 mak halo ita labele realiza kongresu,” Prezidente Komisaun ne’e, hateten ba jornalista-sira iha edífisiu CDTL Gináziu-Dili, sesta ne’e.

Estrutura ho orgaun assemblea jerál CDTL hamutuk Konsellu Jurídiku inklui Konsellu Fiskál halo ona preparasaun hodi simu lista kandidatura ba estrutura sei hahú 18 to’o 26 outubru.

Kandidatura ba Prezidente sei prienxe dokumentu sira mak hanesan, formuláriu kandidatura Prezidente Ezekutivu, lista pakote kandidatura no seluk tan.

Komisaun hala’o verifikasuan dokumentu iha 27 to’o 29 outubru. Anunsiu rezultadu verifikasaun loron 4 novembru.

Rekursu ba rezultadu verifikasaun iha 09 novembru no periodu konsolidasaun hosi kandidatura sira hahú hosi loron 10 to’o 17 novembru.

Nune’e kongresu ne’e sei nakloke ba públiku no kada federasaun desportu hotu iha Timor – Leste bele kandidatu nia ema atu ba tuur iha estrutura CDTL.

Iha fatin hanesan, Prezidente atuál CDTL, Afranio Xavier Amaral, informa, kongresu ne’e nakloke ba ema hotu ne’ebé iha kapasidade no vizaun di’ak hodi dezenvolve desportu bele tuir.

“Kongresu ida ne’e ita sei hala’o ho demokrátiku, sé de’it hakarak bele partisipa, importante ho programa ne’ebé klaru atu dezenvolve desportu iha nasaun ne’e,” Prezidente CDTL afirma.

Entretantu, CDTL hanesan orgaun ida ne’ebé tutela ba Sekretariu Estadu Juventude no Desportu (SEJD) hodi fó mahon ba federasaun desportu hotu iha Timor – Leste.

Daudaun ne’e, CDTL fó mahon ba federasaun desportu iha Timor-Leste hamutuk 30-resin.

Kongresu CDTL nian hala’o ba dala haat ona, dahuluk iha 2000 ne’ebé João Crasacalão  mak eleitu sai Prezidente to’o 2010, daruak hili Miguel Manetelo maka hanesan Prezidente hosi 2010 to’o 2013. Datoluk hili Higenio Trindade mak sai prezidente hahú tinan 2013 to’o 2016, no Dahaat hili Afranio Amaral ne’ebé mandate hotu ona iha marsu tinan ne’e.

Jornalista: Hortencio Sanchez

Editór: Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here