ONG BIFANO motiva komunidade Usitasa'e konstrui Gabiaun ho modelu tradisionál. Imajen espesiál.

OÉ-CUSSE, 15 outubru 2021 (TATOLI) — Organizasaun Naun Governamentál (ONG) Binibu Faef Nome (BIFANO), motiva komunidade suku Usitasa’e, sub-rejiaun Oésilo, Rejiaun Administrativa Espesiál Oé-Cusse Ambeno (RAEOA) uza au hodi konstrui Gabiaun ho modelu tradisioál nune’e satán erosaun no indundasaun iha tempu udan.

Konstrui Gabiaun ho modelu tradisionál ne’e fasilta hosi ONG BIFANO ba komunidade aldeia tolu kompostu hosi Sifin, Pune no Buqui iha suku Usitasa’e, sub-rejiaun Oésilo, RAEOA.

Diretór ONG BIFANO, Jacinto Mala, esplika, programa ne’e realiza hosi organizasaun refere hamutuk ho estrutura jestaun dezastre naturál iha suku Usitasa’e, ne’ebé hetan apoia fundu hosi ONG internasionál OXFAM no programa Australian Humanitaria Project Dezastre Ready.

“Ita hotu hatene dezastre naturál akontese iha 4 abríl, maioria komunidade hetan afetasaun maka’as, balu lakon sira-nia to’os, natar no estraga estrada públiku, liuliu iha suku Usitasa’e, tanba ne’e maka ONG BIFANO mobiliza komunidade hosi aldeia tolu, uza bambu (au) hodi halo Gabiaun ho modelu tradisionál, ho objetivu halo rekuperasaun ba fatin risku sira, antes udan monu-rai,” Jacinto Mala, informa ba Agência TATOLI, iha Oé-Cusse , sesta ne’e.

Sosiedade sivíl ne’e argumenta, atividade ne’e realiza ho voluntáriu hosi komunidade, serbisu ne’e importante no tenke finaliza iha tempu badak, nune’e solusiona risku dezastre naturál iha tempu udan.

“Gabiaun ne’ebé ami halo ho modelu tradisionál, uza au kesi ho arame ense fatuk, nune’e bele proteje erosaun no inundasaun ne’ebé rezulta hosi bee-sulin. Nia dimensaun hosi au ne’e sentímetru 0,50 ho naruk metru-neen,” nia esplika.

Xefe suku Usitasa’e, Tomas Ulan Colo, konsidera programa ne’e inisiativa di’ak hosi ONG BIFANO, hanesan motiva komunidade oinsá uza materiál tradisionál hodi halo dezenvolvimentu iha knua rasik.

“Mobilizasaun komunidade atu envolve iha programa ne’e, ha’u konsidera hanesan inisiativa di’ak atu motiva inan-aman sira, atu koñese di’ak liután ba materiál tradisionál sira hanesan au, ita bele uza halo kanalizasaun bee-moos,” autoridade lokál ne’e louva.

Entretantu, fatin konstrui Gabiaun tradisionál ne’e iha fatin-neen iha aldeia tolu ne’ebé perténsia suku Usitasa’e. Totál populasaun iha suku Usitasa’e hamutuk 4.188 kompostu hosi aldeia Sifin 1.313, aldeia Pune 1.366 no aldeia Buqui 1.509.

Jornalista        : Abílio Elo Nini
Editór              : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here