Kondisaun merkadu iha postu administrative Cailaco, munisípiu Bobonaro. Imajen Sérgio da Cruz/Imajen Agência TATOLI.

BOBONARO,15 outubro 2021 (TATOLI) — Administradór Postu Administrativu Cailaco, Munisípiu Bobonaro, Alfredo Meta Dao hateten Governu Sentrál mak iha kompeténsia hadi’a kondisaun merkadu Cailaco ne’ebé oras ne’e la seguru ona.Alfredo Meta Dao fó-sai katak kondisaun merkadu ne’e la seguru ba negosiante sira, tanba kondisaun infrastrutura harii iha tinan barak ona, no daudaun ne’e la merese ona atu uza ba negósiu.

“Loos duni merkadu ida-ne’e ninia kondisaun ladi’ak ona, maibé ida-ne’e kompeténsia Governu Sentrál nian oinsá ita atu jere merkadu ne’e ida saudável, mais ne’e tenke presiza tempu no polítikCailacoa, atubele jere a ema hotu-hotu mai basar ho seguru,” Administradór postu  ne’e informa ba Agência TATOLI, iha merkadu refere, sesta ne’e.

Negosiante sentru merkadu Cailaco, Rosita Soares, husu governu atu konstrui merkadu foun, tanba kondisaun merkadu atuál la seguru ona atu halo negósiu.

“Ami senti araska loos, kuandu tempu anin, foer sira-ne’e anin hú halo modo fo’er hotu. Piór liután iha tempu udan, ne’e merkadu laran sira-ne’e bee nakonu, tanba kalen kuak hotu ona,” negosiante ne’e informa.

Nia haktuir, ho situasaun ne’e, halo negosiante barak mak abondona merkadu tanba kondisaun uma la dignu ona atu sira fila-liman.

“Agora, ha’u mesak mak lor-loron fa’an, tanba ami lori bebak no ai hadi’a rasik de’it, mais iha fatin ne’e de’it mak di’ak, fatin sira seluk ne’e ai dodok hotu ona, ema hotu ta’uk halai hotu ona,” nia informa.

Nia dehan, ho kondisaun merkadu ne’ebé grave tebes, fó impaktu ba rendimentu tanba konsumidór menus nunee loron ida bele hetan de’it $5, dalaruma mós la hetan liu, to’o modo dodok hotu.

“Modo sira-ne’e ami sosa iha ema de’it, dalaruma ami hola $10 dolar, osan inan mós la-fila, ida ne’e mak ami senti susar tebes, agora la hetan osan ne’e hodi saida mk ami fó ba oan sira eskola ne’e, se kuandu loron kuarta ema mai bazar ami senti di’ak oituan,” nia haktuir.

Entertantu komunidade postu administrativu Cailaco iha aldeia 24, suku ualu, ho totál populasaun hamutuk 13.930-resin no totál uma kain 4.000.

Tuir observasaun Agência TAOLI, observa katak dezde establesimentu merkadu, fatin lixu komunidade sira sunu tiha ona tanba laiha ekipa jestaun merkadu atu kontrola lixeiru sira-ne’e. Nune’e mós lixu iha merkadu ne’e komunidade sira fakar arbiru de’it, tanba espasu la sufisiente ona.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here