Pesoal saúde prepara hela vasina AstraZeneca hodi fó abitante sira iha Sentru Saude Comoro, segunda (04/10). Imajen TATOLI/António Gonçalves

VIQUEQUE, 15 outubru 2021 (TATOLI)—Maioria abitante hosi suku Matahoi, postu administrativu Uatulari, munisípiu Viqueque, simu ona vasina, maibé hela na’in-sia mak seidauk simu.

“Delegadu sira hosi suku Matahoi ba konvese sira na’in-sia, maibé susar atu konvense sira hodi simu vasina,” Xefe suku Matahoi, António Amaral, informa ba Agência TATOLI, iha edifísiu Administrasaun Viqueque, sesta ne’e.

Tuir líder komunitáriu ne’e, vasina hanesan forma di’ak liu atu hasa’e imunidade hodi salva ema no kontra moras COVID-19.

“Ha’u la komprende tanba saida maka ema lakoi simu vasina. Vasina ne’e, buat di’ak ba ita hodi salva ita hosi moras COVID-19. Dadus populasaun suku Matahoi ninia númeru maka ha’u ladún hatene loloos, maibé ha’u hatene hela na’in-sia de’it maka seidauk simu vasina,” nia akresenta.

Tuir dadus, populasaun suku Matahoi hamutuk 4.492 (sensu 2015), kompostu hosu aldeia Aele, Buca Dalan-Matahoi, Calohan-Uatulo, Dalan Los-Uanama, Iraler, Loco Loco, Mau Ciac, Mauseloc, Tatilari, Uani Uma, Uasufa, Ulusu.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here