Univesidade Nasionál Timor Lorosa’e (UNTL). Imajen TATOLI/Francisco Sony

DILI, 14 outubru 2021 (TATOLI)—Universidade Nasional Timor Lorosa’e (UNTL) hamutuk ho parseiru lansa Grupu Traballu Tékniku ho membru na’in-25 hodi inisia ambiente kampus Seguru ba estudante sira.

Grupu ne’e kompostu hosi reprezentante fakuldade sia, reprezentante hosi senadu no estudante sira, inklui reprezentante hosi Ministériu Ensinu Superiór, Siénsia no Kultura (MESSK), Komisaun Funsaun Públiku (KFP) no UN Women.

Reitór UNTL, João Soares Martins, ne’ebé lidera grupu traballu ne’e, komprometidu sei serbisu maka’as atu sai ponte advokasia ba igualdade jéneru hodi asegura asédiu seksuál iha universidade públiku ne’e.

“Ami komprometidu atu serbisu hamutuk ativamente halo advokasia ba igualidade jéneru no zero toleránsia ba asédiu seksuál, inklui forma hotu violénsia bazeia ba jéneru iha UNTL,” Responsável grupu traballu hateten iha ámbitu seremónia lansamentu grupu, iha Hotel Timor, kinta ne’e.

Tuir akadémiku ne’e, universidade sai pontu kritikál tebes atu harii espasu no sosiedade ida equitável liuhosi implementasaun programa sensível jéneru.

Nia konsidera, estudu ne’ebé UN Women halo iha Dili iha tinan 2018, esploratóriu tebes ba sidade seguru iha Timor-Leste, ne’ebé hatudu rezultadu maioria respondente admite la seguru atu utiliza espasu públiku iha kapitál.

Nune’e, João Martins otimista grupu traballu bainhira impelementa programa sei hetan susesu tanba fornese giaun estratéjiku ida ba projetu ne’e, nune’e bele tulun UN Women identifika no haree oportunidade atu hasa’e kapasidade no promove inistiativa kampus nian.

Aleinde ne’e, inisiativa ne’e atu hasa’e konsiénsia atu eduka liuhosi asaun prevensaun ho forma hotu, hodi evita violénsia bazeia ba jéneru iha universidade nasionál ne’e.

“Atu susesu prevene violénsia bazeia ba jéneru, presiza kolaborasaun hotu, hanesan partisipasaun dosente no funsionáriu administrasaun, inklui estudante sira tenke fahe matenek ba malu. Buka advokasia no hasa’e koñesimentu iha área espsífiku atubele sai xave susesu ba inisiativa kampus seguru, nune’e bele demonstra ezemplu ba instituisaun edukasaun superiór sira seluk iha Timor-Leste,” nia akresenta.

Tuir Reitór UNTL, loloos atividade hanesan ne’e realiza kleur ona, maibé problema maka atividade sira ne’e la alarga ba públiku.

“UNTL iha ona estrutura, ami iha pro-reitór asuntu provedór no akonsellamentu, tanba ne’e bainhira akontese abuzu seksuál ruma iha kampus, ita sei halo akonsellamentu. Servisu ida-ne’e ita halo ona, maibé ita agradese tanba UN Women ne’ebé iha inistiava hakarak halo serbisu ida hodi asegura Kampus Seguru iha Timor-Leste,” nia subliña.

Hetan fundu millaun $7 hosi KOICA ba tinan-haat

Ba inisiativa grupu traballu tékniku atu kria ambiente kampus ne’ebé seguru ba estudante sira, hetan fundu millaun $7 hosi Korea International Cooperation Agency (KOICA) ba implementasaun programa durante tinan-haat.

Diretór Nasionál KOICA iha Timor-Leste, Eunju Cha, hateten, ajénsia ne’e kontinua suporta fundu atu alkansa inisiativa Kampus Seguru iha Timor-Leste, liuhosi implementasaun programa hosi UN Women, United Nations Sexual and Reproductive Health Agency (UNFPA), International Organization for Migration (IOM), no United Nations Development Programme (UNDP).

“KOICA fiar katak inisiativa ne’e sei kontribui atu aumenta ajuda ba esforsu sira ne’ebé eziste ona hosi planu asaun nasionál violénsia bazeia ba jéneru iha Timor-Leste,” nia akresenta.

Nia konsidera, kolaborasaun ne’e atu harii espasu seguru ne’ebé di’ak liu ba feto atu atinje sira-nia poténsia tomak ho másimu no hanesan advogadór ba igualdade jéneru, tanba ne’e ajénsia ne’e sente onradu bele fó apoiu finaseiru.

“Ami sente onradu bele hola parte hanesan autór hodi lori mudansa ba dezenvolvimentu komunidade nian. Ida-ne’e krítiku atu mane sira iha konsiénsia no hanoin ba igualdade jéneru,” nia dehan.

Implementasaun inisiativa Kampus Seguru ne’e sei halibur hamutuk parte interesadu no entidade iha universidade sira, atu hatan hodi elemina forsa violénsia iha kampus no buka atu promove kampus ida seguru no bele sai fatin livre hosi violénsia no espasu públiku ida inkluzivu ba ema hotu.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here