Imajen Tatoli/Nelia Fernandes.

DILI, 14 outubru 2021 (TATOLI)—Sekretáriu Estadu Komunikasaun Sosiál (SEKOMS), kinta ne’e aprezenta rezultadu peskiza kona-ba ‘Persepsaun Públiku kona-ba Fornesimentu Informasaun ba Públiku hosi Mídia Estatál no Privada’ iha Timor-Leste.

Tékniku Profisionál Análiza Mídia SEKOMS, Carsiliano Oliveira, informa rezultadu peskiza ne’e hatudu katak mídia estatál Rádiu Televizaun Timor-Leste mak okupa primeiru lugar, mídia privadu GMNT sai segundu lugar no mídia estatál online Agência TATOLI okupa terseiru lugar iha fornesimentu informasaun ba públiku durante ne’e.

“Iha atividade peskiza ne’ebé ekipa SEKOMS hala’o iha Munisípiu 12, la inklui Rejiaun Administrativa Espesiál Oé-Cusse Ambenu (RAEOA), rezulta RTTL okupa primeiru lugar, GMNTV segundu lugar no mída online Tatoli terseiru lugar fornese informasaun ba públiku iha territóriu nasionál,” Carsiliano Oliveira hateten iha ninia aprezentasaun ba rezultadu peskiza iha Salaun Prezidente KonselluMinistru (PCM), Dili, kinta ne’e.

Tuir rezultadu peskiza ne’e hatudu katak rádiu ne’ebé okupa iha fatin dahuluk mak Rádiu Televizaun TimorLeste (RTTL) ho respondente 544 (54%), Rádiu Komunidade ho 334 (34%), Rádiu GMNTV 43 (4%), Rádiu Maubere 43 (4%), Rádiu Liberdade 4 (1%), Rádiu Timor Kmanek (RTK) ho 23 (2%), enkuantu rádiu sira seluk ho presentajen ne’ebé kiik.

Entretantu iha kanál televizasaun ne’ebé okupa iha fatin dahuluk mak Rádiu Televizaun TimorLeste (RTTL) respondente 700 (70%), GMNTV 236 (24%), TV kanal Estránjeiru 47 (5%), TV Maubere 11 (1%), enkuantu Televizasaun sira seluk ho presentajen ne’ebé kiik.

Iha sorin seluk, iha kanal online ne’ebé okupa iha fatin dahuluk mak Rádiu Televizaun TimorLeste (RTTL) ho respondente 376 (38%), GMNTV 253 (25%), Agência Noticiosa de TimorLeste (TATOLI) 233 (23%), no Tempo Timor 60 (6%), enkuantu mídia online sira seluk ho presentajen ne’ebé kiik.

Rezultadu peskiza ne’e bazea ba metodolojia mak entrevista direta audiensia iha sira-nia fatin (individual ho grupu), prenxe kestionáriu, enumeradór sira hetan formasauun badak no sei halo pratika loron ida Dili, antes atu koloka ba Munisípiu, hili sampel ho métodu stratified sampling random hosi grupu trajetu.

Metodolojia peskiza ida-ne’e ho metodu kuantitativu, no kada munisípiu 60 respondente no Dili mak hetan respondente besik 200 la inklui Oé-Cusse tanba kestaun konfinamentu obrigatóriu, no totál 1002 sampel no marjing error ba peskiza ida-ne’e ho nivel konfiansa (95%). 

Hosi rezultaduu peskiza ne’e hatudu konkluzauun katak, rezultadu peskiza nasional ba persepsaun públiku ne’e hatudu katak mídia estatál mak hetan fiar hosi publiku ho pursentu ne’ebé signifikante kada asuntu.

Rezultadu peskiza ne’e mós indika katak uniku GMNTV mak sai segundu lugar ne’ebé hetan fiar hosi publiku ho persentajen di’ak, rezultaduu peskiza ne’e hatudu katak rádiu komunidade (RAKOM) ne’ebé hetan fundu transferensia hosi Governu hetan asesu di’ak hosi komunidade iha área rurál no mídia privada sira seluk nunka domina iha asuntu ka informasaun hotu-hotu kompara ho midia estatál.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here