Prezidente Autoridade RAEOA, Arsénio Paixão Bano. Imajen TATOLI/Francisco Sony

OÉ-CUSSE, 14 outubru 2021 (TATOLI) — Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hateten projetu rekonstrusaun Gabiaun atu proteje natar no to’os iha territóriu enklave ne’e.

Prezidente RAEOA, kuarta ne’e kontinua lansa fatuk-dahuluk ba projetu rekonstrusaun unidade rua, ida iha natar Tku’as, aldeia Buqui, suku Usitasae, sub-rejiaun Oésilo. Nun’e mós ida iha natar Maumate, aldeia Baqui, suku Naimeco, sub-rejiaun Pante Makasar.

Projetu rekonstrusaun Gabiaun unidade rua ne’e ezekuta hosi empreza Lifau-Indah, iha natar Tku’as ho montante orsamentu $129.084,67 ho distánsia metru 500. Iha natar Maumate ho distánsia metru 2000 (kilómteru rua) ho orsamentu ne’ebé previstu iha kontratu $545.308,50 ho durasaun serbisu durante loron 120.

Prezidente Autoridade RAEOA, Arsénio Paixão Bano, esplika projetu Gabiaun iha Naimeco importante tebes, tanba objetivu hosi projetu ne’e atu asegura área protejida hamutuk ektare 83,8 ho totál benefisiáriu hamutuk na’in-278.

Nune’e mós atu rekupera ekonomia liuhosi projetu Gabiaun atu fó servisu ba komunidade 250 maioria ferik no katuas’

Objetivu prinsipál harii projetu Gabiaun hirak-ne’e atu proteje komunidade nia patrimóniu agrikultura nian, liuliu área produtivu sira-ne’ebé hetan estragu iha dezastre naturál siklone tropikál seroja ne’ebé akontese iha 4 abríl liubá

Nia husu inan-aman sira presiza koopera malu hamutuk ho empreza, nune’e bele aselera serbisu Gabiaun hirak-ne’e, tanba udan besik mai ona, entaun molok udan monu-rai projetu ne’e bele termina ona serbisu.

“Ita hamutuk maka Oé-Cusse tenke dezenvolve, hanesan agrikultór presiza maka natar no to’os tenke iha no livre hosi afetasaun dezastre, entaun autoridade tau prioridade atu fasilita Gabiaun nune’e bele proteje ita-nia natar no to’os,” Arsénio Paixão Bano, informa ba Agência Tatoli iha Oé-Cusse, kinta ne’e.

Entretantu, Sekretáriu Rejionál ba Asuntu Agrikultura, José Eta, apela ba komunidade atu redús tesi ai-horis sira iha foho lolon, tanba tuir dadus peskiza nian, hosi parseriu ONG World Neighbor (WN), katak iha tinan 2020, kada tinan udan monu-rai lori sedimentasaun ho kuantidade 2000, tanba kauza hosi tesi ai.

Kauza hosi tesi-ai arbiru ne’e halo ai nia abut la-metin, nune’e sedimentasaun bele estraga natar no to’os rai maran.

Purtantu, Diretór Empreza Lifau-Indah, Fernando Mak, promete finaliza obra rua ne’e tuir termu kontratu ne’ebé asina ona ho autoridade RAEOA.

Iha tinan orsamentu 2021, autoridade RAEOA loke konkursu públiku ba projetu rekonstrusaun Gabiaun hamutuk unidade 20, kobre ba sub-rejiaun Oésilo, Nítibe no Pante Makasar ho ia montante orsamentu millaun $2-resin.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here