Pesoál saúde prepara ekipamentu vasina hodi fó vasina Astrazeneca ba komunidade iha Sentru Saúde Comoro, segunda (13/09). Imajen TATOLI/António Gonçalves

DILI, 14 outubru 2021 (TATOLI)–Primeiru-Ministru (PM), Taur Matan Ruak, kinta ne’e, halo reuniaun semanál ho Prezidente Repúblika (PR), Francisco Guterres ‘Lú Olo’ hodi relata progresu serbisu Governu.

Iha reuniaun, parte rua diskute kona-ba prevensaun no mitigasaun surtu COVID-19, liuliu kampaña vasinasaun no situasaun surtu iha Timor-Leste.

“Prezidente Repúblika rekomenda Governu tenke halo esforsu atu vasina, sira ne’ebé iha tenke vasina hotu populasaun, tanba ne’e maka ami esforsu hela no espera bele aplika hotu vasina ne’ebé iha tanba to’o agora ita simu vasina hamutuk millaun 1,3 maibé stock vasina ne’ebé iha hamutuk 400.000,” Xefe Governu informa hafoin reuniaun, iha Palásiu Prezidensiál, Bairro Pité.

Notísia relevante: Partisipasaun membru Governu iha kampaña vasinasaun aumenta 17%

Xefe Ezekutivu dehan, bainhira persentajen vasinasaun to’o 80% mak bele normaliza ona atividade sira, liliu atividade ekonómiku.

“Persentajen vasina nível nasionál seidauk atinje 70%, prátikamente nível nasionál iha segunda doze foin atinje 40%. Ita sei dook liu hosi ita-nia alvu ne’ebé hakarak 80%, ne’ebé espera iha dezembru bele atinje ida-ne’e, nune’e bele normaliza filafali situasaun,” nia akresenta.

Normalizasaun ne’e sei fasilita mós Governu ba realizasaun atividade tinan oin ba Eleisaun Prezidensiál no atividade ekonómiku.

Enkuantu, vasina ne’ebé fó ba populasaun elijível ho idade 18 ba leten, to’o iha kuarta (13/10), dader tuku 10:00 otl, tuir sistema informasaun saúde, doze dahuluk iha territóriu tomak atinje ona 65,5% no doze daruak atinje ona 41,6%.

Iha kapitál nasaun (Dili) doze dahuluk 79,6% no doze daruak 70,7%, Covalima doze dahuluk 79,1% no doze daruak 51,3%, Viqueque doze dahuluk 79% no doze daruak 49,8%, Rejiaun Administrativa Espesiál Oé-cusse Ambeno (RAEOA) doze dahuluk 75,5% no doze daruak 40,5%, Baucau doze dahuluk 65,7% no doze daruak 32.8%, Manufahi doze dahuluk 64,4% no doze daruak 28.8%.

Manatuto doze dahuluk 62,7% no doze daruak 30,1%, Aileu doze dahuluk 56,5% no doze daruak 22,6%, Lautém doze dahuluk 55,4% no doze daruak 29,9%, Liquiçá doze dahuluk 53,5% no doze daruak 26,8%, Bobonaro doze dahuluk 49,1% no doze daruak 26,3%, Ermera doze dahuluk 44,7% no doze daruak 14,1%, no ikus liu Ainaro doze dahuluk 44,7% no doze daruak 17,5%.

Jornalista : Antónia Gusmão

Editora      : Julia Chatarina  

HAKEREK NO HATÁN

Please enter your comment!
Please enter your name here