Komandante Jerál PNTL, Komisáriu, Faustino da Costa. Imajen Tatoli/Francisco Sony

DILI, 14 outubru 2021 (TATOLI)— Komandante Jerál Polísia Nasionál Timor-Leste (PNTL), Komisáriu Faustino da Costa, akompaña Segundu Komandante, Komisáriu, Mateus Fernandes, enkontru ho Prezidente Repúblika, Francisco Guterres “Lú-Olo”, hodi informa preparasaun asegura eleisaun Presidensiál 2022. 

“Ami ko’alia ho Prezidente Repúblika kona-ba preparasan Polísia Nasionál Timor-Leste (PNTL) ba atividade politika liuliu kampaña  no eleisaun sira. Nune’e Prezidente Repúblika hato’o atu PNTL kontinua prepara aan hodi kria kondisaun atu asegura,” Komisáriu Faustino, hateten hafoin remata enkontru ho Xefe Estadu iha Palasiu Prezidensiá, Bairru-Pité, kinta ne’e.

Xefe Estadu mós preokupa rekursu umanu, maibé daudaun PNTL hosi nivél munisípiu  hahú  prepara tuir formasaun sira atu asegura atividade kampaña no eleisaun.

“Ita prepara halo kapasitasaun ba ita nian ema sira atu halo operasaun no kria kondisaun atu asegura eventu importante ne’e iha 2022,” nia akresenta.

Hasa’e konsénsia lori karreta no motór

Aleinde ne’e, Komandante Jerál PNTL ne’e  husu ba públiku atu hatudu konsénsia, bainhira lori  karreta no motorizada atu kontribui ba redusaun númeru asidente tráfegu.

“Estrada públiku ne’e la’ós ema ida ka ema rua nia de’it, maibé ba ema hotu tanba ne’e tenke kuidadu bainhira lori transporte,” KomJer fó hanoin

PNTL iha ona programa ida ida hanaran “kultura hadomi vida” atu redús númeru asidente tráfegu iha Timor-Leste.

“Ami halo ona diseminasaun ba   Universitáriu sira hodi hadomi nia aan, tanba vida importante, vida ne’e ema ida ninian. Nune’e liuhosi programa ne’e fó hanoin atu lori viatura tenke kuidadu,” Komisáriu Faustino subliña.

Entretantu, iha semana dahuluk, hosi loron 01 to’o 12 outubru, PNTL rejista kazu asidente trágefu hamutuk 37 akontese iha territóriu nasionál.

Aleinde kazu asidente tráfegu, PNTL rejista mós kazu insidente hamutuk 19, kompostu hosi violasaun doméstika, asaltu malu no kazu krime seluk.

Notísia relevante: PNTL rejista asidente tráfegu 37 iha semana dahuluk

Jornalista: Natalino Costa

Editór: Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here