Autoridade lokál Viqueque partisipa iha sensibilizasaun levantamentu dadus abitasaun hodi halo evaluasaun, iha salaun munisípal Viqueque, kinta (14/10). Imajen TATOLI/Vitorino Lopes da Costa

VIQUEQUE, 14 outubru 2021 (TATOLI)–Ekipa hosi Ministériu Obra Públika (MOP) liuhosi diresaun tolu halo sensiblizasaun kona-ba abitasaun ba autoridade lokál iha munisípiu Viqueque, tanba atu inisia ona levantamentu ba implementasaun programa abitasaun.

Diresaun tolu hosi MOP ne’ebé envolve ba atividade ne’e mak hanesan Diresaun Jerál Abitasaun no Urbanizmu, Diresaun Nasionál Urbanizmu, no Diresaun Nasionál Abitasaun.

“Objetivu prinsipál hosi sensibilizasaun kona-ba levantamentu dadus hodi identifika abitasaun no evalua filafali abitasaun ne’ebé antes ne’e implementa. Ita sei evalua hahú hosi tempu ukun-an to’o agora, tanba iha ne’ebá iha kustu no ami hakarak evalua uma MDG, uma ba veteranu inklui kazerna ba Polísia Nasionál Timor-Leste (PNTL),” Diretór Nasionál Abitasaun MOP, Lolita da Silva Amaral, informa ba Agência TATOLI, iha salaun munisípal Viqueque, kinta ne’e.

Levantamentu dadus abitasaun sosiál hanesan Uma Kbiit Laek no Kazerna PNTL hodi halo estudu ba implementasaun programa iha futuru.

“Diresaun ne’e hakarak hasai povu hosi mukit no kiak, nune’e hetan tratamentu dignu. Tanba ne’e, ekipa sira tun mai terrenu hodi observa konstrusaun fíziku,” nia akresenta.

Iha fatin hanesan, Administradór munisípiu Viqueque, Januario Sores ‘Boly,’ hateten, maski atividade sensibilizasaun ne’e importante, maibé xefe suku no aldeia sira ladún partisipa másimu ho razaun okupadu, maibé inisiativa ne’e mai hosi nasionál hodi hasa’e koñesimentu no dezenvolve suku.

Antes ne’e, Governu harii uma MDG hamutuk 2.154 no sei konstrui tan 1.518 (bazeia relatóriu Tribunál Kontas), uma ba veteranu ne’ebé dedika-an durante tinan 20-24 ba libertasaun nasionál, iha territóriu tomak hamutuk 96, no kazerna ba PNTL iha munisípiu.

Enkuantu, uma MDG iha Viqueque implementa iha suku Vesoru no Bahalara Uain.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here