Ministru Edukasaun, Juventude no Desportu. Armindo Maia. Imajen TATOLI/Francisco Sony

DILI, 14 outubru 2021 (TATOLI)—Ministériu Edukasaun Juventude no Desportu (MEJD) iha faze re-verifikasaun dadus profesór molok loke vaga ba profesór hamutuk 975, ne’ebé tuir planu atividade ne’e sei finaliza iha novembru tinan ne’e.

“Agora iha hela prosesu re-verifikasaun dadus tanba dadus ne’ebé ami simu rungu ranga loos, entaun ami tenki kria ekipa ida hodi re-verifika fali dadus profesór sira,” Ministru Edukasaun Juventude no Desportu, Armindo Maia, informa foin lalais ne’e, iha Palásiu Governu.

Notísia relevante: Dedikasaun antiguidade baze ba rekrutamentu profesór na’in-975

Tuir Ministru, presiza halo re-verifikasaun, nune’e bainhira loke vaga bele la’o tuir kritériu sira, ne’ebé sei loke oprtunidade ba profesór voluntáriu, kontratadu no kazuál.

“Ita iha totál profesór purvolta 5.203 maka tama kategória tolu ne’e,” nia akresenta.

Aleinde ne’e, MEJD sei aprezenta prosesu rekrutamentu ba Komisaun Funsaun Públiku (KFP) atu haree prosedimentu legál sira.

Daudaun ne’e iha profesór hamutuk 16.618 iha territóriu tomak no hosi númeru ne’e, tama reforma ka invalides iha 1.015 no sira ne’ebé foin prepara-an tama reforma iha 1.484.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here