Veteranu atuál membru Konsellu Kombatente no Libertasaun Nasionál Munisípiu Baucau, Manuel Locateli Gusmão Soares ‘Lotuk’. Imajen Agência TATOLI/Natalino Belo.

BAUCAU, 14 outubru 2021 (TATOLI) – Veteranu atuál membru Konsellu Kombatente Libertasaun Nasionál Munisípiu Baucau, Manuel Locateli Gusmão Soares ‘Lotuk’, husu governu atu hakbesik dezenvolvimentu ba suku Ossouala tanba fatin ne’ebé hola-parte liha uta ba ukun rasik-an.

“Ossouala oan sira iha tinan 1984 forsa Indonézia kaptura oho, balun to’o agora seidauk hetan tanba kontaktu FRETILIN tanba ne’e ha’u husu favór governu tau-netik matan mai Ossouala,” veteranu Lotuk informa ba Agência TATOLI, iha sede suku Ossouala, kinta ne’e.

Eis gerrillu ne’e haktuir, komunidade suku Ossouala kontribui ba luta ukun rasik-aan, hahú kedas antes forsa Indonézia invade Timor-Leste liuhosi instala baze zona Besau, sentru Kablaki A to’o ukun-an.

Iha tinan 1980, bainhira Xanana Gusmão hahú re-organiza funu hafoin baze apoia rahun, forsa sira iha sentru-leste iha fatin-fatin laiha ona, Ossouala oan mak simu Xanana Gusmão tanba hakarak ukun-aan.

Nia dehan, Timor-Leste ukun-aan kle’ur ona maibé dezenvolvementu iha Ossoala seidauk iha, maske kontribui ba ukun-aan.

Desizaun hotu iha governu, nu’udar Ossouala oan kontribuisaun mak liberta ona pátria, enkuantu prosesu dezenvolvementu agora iha matenek sira-nia liman.

“Ita bele liberta ona ita-nia rain, maibé povu seidauk, barak mak sei iha nakukun laran, Ossouala seidauk iha eletrisidade no estrada sei aat,” Lotuk argumenta.

Lotuk rasik hahú envolve iha luta libertasaun nasional iha tinan 1975 ne’ebé hola-parte iha Forsa Auto Defeza (FADA) ne’ebé kna’ar mak ajuda populasaun evakua ba baze fatin konsentrasaun iha Uaimori, zona 20 maiu.

Hafoin forsa Indonézia atake zona Uaimori, nune’e Lotuk hamutuk ho lutadór sira kontinua evakua populasaun ba tasi mane to’o asegura iha foho antes populasaun rende tanba orientasaun Komandu.

Hafoin re-organiza fali funu hosi Komandu da Luta, nia kontinua hamutuk ho FALINTIL iha ai-laran hodi kolabora ho kaixa klandestina sira kontinua luta hasoru forsa Indonézia to’o ukun-an.

Maske nune’e, Lotuk nafatin enkoraja juventude rezisténsia no veteranu ninia oan sira atu fó ulun atu asesu ba edukasaun, nasaun ida hamrik mesak presiza ema matenek.

Lotuk hetan rekoñesementu nu’udar veteranu hosi Estadu ho kategória 15-19. Suku Ossouala ne’e perténsia ba postu administrativu Vemasse, munisípiu Baucau.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here