Koordedór EBF 40 Has Ain, Crispin Bere. Imajen Tatoli/Celestina Teles.

COVALIMA, 14 outubru 2021 (TATOLI)—Koordenadór EBF 40 Has Ain, Crispin Bere, informa estudante Eskola Bázika Filiál (EBF) 40 Has Ain ho idade 12 to’o 17 prontu ona atu simu vasina Pfizer.

Notísia Relevante: Sábadu, vasina Pfizer doze 100.620 to’o Timor-Leste

“Estudante sira prontu atu simu vasina, tanba molok ne’e ami fahe ona informasaun ba sira katak estudante ho idade 12 to’o 17 sei simu vasina Pfizer,” Crispin Bere hateten ba jornalista sira hafoin Vise-Ministru Edukaaun Juventude no Desportu (MEJD), António Guterres, vizita Eskola Bázika Filiál (EBF) Has Ain, kinta ne’e. 

Nia hateten, estudante sira prontu atu simu vasina Pfizer tanba loro-loron estudante sira husu beibeik ba profesór sira katak bainhara mak sira atu simu vasina Pfizer. 

“Ami fahe ona informasaun ba estudante no inan-aman sira kona-ba vasina Pfizer ne’e. Nune’e, bainhira vasina to’o iha Covalima estudante sira-ne’e prontu atu kontribui hodi simu vasina.  Ho sensibilizasaun, labarik sira komprende kona-bá importánsia hosi vasina ne’e atu hasa’e sira-nia  imunidade no prevene transmisaun COVID-19, nune’e sira bele halo movimentu ba-nai ho livre,” nia hateten. 

Totál estudante iha EBF 40 Has Ain hamutuk 152, hosi númeru ne’e na’in 40 mak sira-nia tinan naton ona atu simu vasina maibé estudante restu ne’e, sira-nia tinan sidauk to’o atu simu vasina.

Antes ne’e, Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins, informa mekanizmu COVAX konfirma ona atu haruka vasina Pfizer doze 100.620, iha loron 16 outubru.

Tuir planu vasinasaun ne’e sei realiza iha eskola sira no ba alunu 50.000, hosi munisípu pre-selesionadu ne’ebé mak sei simu vasina ba dahuluk. Vasina permite ba foinsa’e sira ho idade hosi 12 to’o 17.

Jornalista : Celestina Teles

Editór       : Cancio Ximenes 

 

PUBLISIDADEiklan

HAKEREK NO HATÁN

Please enter your comment!
Please enter your name here