Prezidente Interinu CNC, Padre Juvito do Rego, akompaña ho Prezidente Conselho de Imprensa, Virgílio da Silva Gurterres, lansa istória pasada, iha Balibo, kuarta ne’e. imajen Agência TATOLI/Sérgio da Cruz.

BOBONARO, 13 outubru 2021 (TATOLI) — Centro Nacional Chega (CNC) kuarta ne’e, lansa exibisaun dokumentu memoriál istóriku sira-ne’ebé akontese iha fronteira Bobonaro, iha ámbitu selebrasaun trajédia Balibo Five ba dala-46.

Prezidente Interinu CNC, Padre Juvito do Rego, esplika atividade ne’e realiza atu prezerva istória pasada, nune’e bele hatutan istória hosi jerasaun ba jerasaun tanba istória mak dignifika ema-nia moris hodi hakat ba oin.

“Espozisaun ida-ne’e hakarak loke ba públiku katak loron ida, fatin ida-ne’e sei sai nu’udar muzeu, memória istória ninian ba munisípiu Bobonaro tomak, entaun CNC halo abertura ida-ne’e, implementa rekomendasaun CAVR nia katak, ita haree-hikas fali ita-nia istória tanba  CNC nia símbolu mós hateten katak “a memória a esperansa”. Signifika loke fali memória tuan ida-ne’e atu ita bele iha esperansa ba futuru molok, ita mate ita-nia jerasaun tuir mai bele koko no halo-tuir,” nia esplika iha ámbitu lansamentu, iha Balibo.

Dukumentasaun memoriál istóriku hirak-ne’e hamutuk 10-resin kompostu akontesimentu masakre, trajédia, funu-sivíl ne’ebé akontese iha fronteira Bobonaro hahú hosi tinan 1974 to’o 1999.

Operasaun Komodo

Liutiha fulan-ida hafoin sorumutu Wonosobo, iha fulan-outubru 1974, Indonézia hahú lansa operasaun espesiál ida ho naran operasaun Komodo nu’udar operasaun antesedente hodi kria kondisaun provável sira ba intervensaun militár, ho obetivu prinsipál mak kria instablidade iha Timor Portugés no konsolida apoia hosi nasaun boot sira hodi fó dalan ba intervensaun militár.

Asaun ne’ebé iha nia impaktu signifikante mak kampaña distorsaun informasaun liuhosi rádiu iha Kupaun, Timor Osidentál ne’ebé ajita katak Portugál sei abandona Timor Portugés, FRETILIN ne’e komunista no integrasaun ho Indonézia mak únika opsaun. Operasaun ne’e lidera direitamente hosi Kolonel Yoga Sugama, Xefe Badan Kordinasi Intelijen Negara (BAKIN) no ninia vise Ali Moertopo.

Funu sivíl UDT-FRETILIN

Saburai, Maliana Bobonaro iha 1975 maioria komunidade adere ba FRETILIN, maibé xefe suku Saburai nu’udar militante UDT, antes formasaun asosiasaun polítika sira iha ona sentimentu ba populasaun sira kontra Xefe suku. Iha loron 11 agostu 1975 liutiha movimentu armada UDT, simpatizante FRETILIN hetan kaptura no kastigu iha edifísiu xefe postu nian, no kontinua detein sira iha Korluli, Maliana ne’ebé UDT utiliza sai nu’udar dadur fatin movimentu armada nian.

Eskuadrasaun Kavalaria 5

Iha loron 30 agostu 1975, militár portugés hosi eskuadrasaun Cavalaria 5 ne’ebé nia baze iha Bobonaro, mai iha Maliana apoiante UDT no APODETI halai ba Timor loromonu (TAHON), durante tinan ida kuaze ema na’in-500 hosi populasaun Masage muda ba Tahon Timor loromonu. Iha momentu ne’e maioria populasaun sira-ne’ebé hetan persegisaun oho no tara kuaze feto na’in- 50, hetan mós violasaun seksuál no labarik sira mate tanba moras.

Operasaun Flamboyan

Tama iha fulan-outubru 1975, Indonézia hasa’e ninia nível operasaun liuhosi ‘Operasi Flambayon’ ne’ebé lidera hosi kolonel Dandim Kalbuadi. Operasaun ne’e hanesan ofensivu militár liuhosi rai, aéreu no tasi hodi hadau territóriu Timor portugés iha area fronteira. Obetivu prinsipál mak atu intesifika instablidade situasaun Timor Portugés hodi dezmoraliza FRETILIN no loke dalan ba operasaun militár ho eskalaun boot.

Nune’e, iha loron 8 fulan-outubru 1975, operasaun hahú ataka dahuluk iha Batugade, iha loron 14 fulan-outubru 1975, hahu ataka Maliana vila no iha loron 16 outubru ataka Balibo ne’ebé hamate jornalista estranjeiru na’in-lima. Jornalista na’in-lima lakon vida iha 16 outubru 1975 mak hanesan Greg Shackleton (reporter),Tony Stewart (gravadór lian), Garry Chunningham (operadór kamera) hosi mídia HSV-7 (Seven network) Melbroune, Brian Peters (operadór kamera) no Malcolm Rennie (reporter) hosi mídia TCN-9 (Nine network) Sidney. Nune’e iha loron 27 outubru hahú hadau Atabae no loke dalan halo invazaun mai Dili.

Ema mate iha operasaun sekreta

Operasaun ne’ebé hala’o hosi ekipa forsa espesiál Indonézia no partisaun sira akontese ona entre fulan-agostu no setembru 1975. Ekipa forsa espesial ne’e tama hosi fronteira Timor osidentál hodi hala’o operasaun separadu hafoin konsentra fila-fali iha área Atabae iha fulan-dezembru 1975.

Relatóriu Chega I dukumenta katak, operasaun ne’e mínimu hamate ema sivíl na’in-20 ne’ebé hela iha postu administrativu Atabae, Cailaco, Maliana, Balibo no Bobonaro.

Iha fulan-janeiru 1976 halo kontra ataka ba FALINTIL iha suku Hauba (Bobonaro), hodi kaptura populasaun na’in-sia (9) iha Hauba no lori ba oho iha Atabae.

Baze-de-apoiu FRETILIN Rahun

Iha fulan-abríl 1977, bainhira baze-de-apoiu rezisténsia FRETILIN iha Tatabei (Atabae, Bobonaro) rahun, lori komunidade sira halai namkari, komandante FRETILIN, FALINTIL fó orden kapturasaun ba populasaun na’in-tolu mak hanesan, Laku Ana, Mateus no Mau Busa. Populasaun na’in-tolu ne’e deskonfia katak sira planu atu rende ba militár Indonézia, maski na’in-tolu ne’e fó nia justifikasaun iha prosesu interrogasaun ba kestaun maibé nafatin hetan oho hosi FRETILIN.

Populasaun tún ba rende

Forsa FALINTIL rezeita desizaun maioria populasaun ne’ebé iha postu Bobonaro atu rende ba forsa Indonézia nia iha kapital munisípiu, situasaun ne’e lori forsa FALINTIL sira konsege tiru mate komunidade balun ne’ebé tún ba rende.

Violasaun direitu umanu hosi TNI

Liutiha atake FALINTIL nian ne’ebé tiru mate forsa militár Indonézia iha Zulo (Zumalai) iha loron 7 dezembru 1983, hodi hatán ba atake hosi FALINTIL nian maka forsa Indonézia kaptura  sira iha postu Bobonaro no Zumalai. Populasaun sira lori ba detein iha baze Koramil iha Bobonaro, populasaun feto no mane kaptura la ho justifikasaun, ema hirak-ne’e hetan baku no kastigu ho kruél no sira seluk hetan oho no halakon hosi militár Indonézia.

Masakre Koramil Bobonaro

Tuir sasin Armando dos Santos, ne’ebé nu’udar  eis deteinadu ida, ne’ebé mós hala’o papél hanesan profesór ba relijiaun katak, iha 20 abríl 1984 antes militár Indonézia no Hansip sira lori sai deteinadu hamutuk dala-neen iha prizaun laran lori ba oho. Kuantidade ema-ne’ebé sira hasai loron hamutuk ema na’in-haat mak Armando dos Santos mós asiste direita iha prizaun laran bainhira militár Indonézia sira ho Hansip hasai deteinadu sira mak  hanesan, José Marcelo, João Mau Ati no Jose Dasi Mau.

Timor-oan hirak-ne’e ne’ebé militár Indonézia lori ba oho mak hanesan Armando dos Santos nia alunu sira maibé iha lista ema 80-resin mak mate no sira-ne’e identidade kompletu hela iha Balibo.

Masakre Cailaco

Iha fulan-abríl 1999, milísia pro-integrasaun Halilintar hamutuk ho forsa Indonézia oho ema na’in-hitu  iha suku Miligo, postu administrativu Cailaco mak hanesan, Paulino Saores, José Paulo Lelo, António Soares, Manuel Mau Lelo Araújo, (lori ba oho iha sede SGI Cailaco nian), Carlito Mau Leto, Domingos Resi Mau (tiru mate iha sede Koramil) no Evangelisto Lima Vidál (tiru mate iha hela-fatin).

Insidente ne’e mosu nu’udar resposta ida hosi asasinatu ne’ebé halo hosi FALINTIL hasoru elementu militár Indonézia ne’ebé mós líder otonomista iha Cailaco ho naran Manuel Gama iha loron hanesan.

Nune’e mós militár Indonézia detein ema atus-resin halo violasaun seksuál hasoru feto klosan sira no oho ema kuaze na’in-20 iha operasaun tuir mai hafoin 12 abríl TNI no grupu milísia (Guntur Botulaku), Halilimtar Dadurus Merah Putih no SGI) oho tán ema na’in-40.

Masakre Polres Maliana

Iha loron 6 setembru 1999, iha Polres Maliana iha enkontru ne’ebé mak partisipa hosi komandante POLRES Maliana Majór Budi Sosilo, Komandante distrik Militer (KODIM) Tenenti Koronél Burhanuddin Siagian, Bupati (administradór) Maliana, Guilerme dos Santos, Xefe Intelijénsia KODIM Tenente Sutriano, Komandante milísia Halilintar João Tavares, Ketua DPRD no FPDK (forum persatuaan demokrasi keadilan) Jorge Tavares, líder DMP Maliana, Marcos Tato Mali.

Rezultadu hosi enkontru ne’e mak fó orden atu populasaun Maliana refujia ba iha POLRES Maliana, no ikus mosu masakre POLRES Maliana iha loron 8 setembru 1999.

Iha loron ne’e, milísia Dadurus  Merah Putih (DMP) no militár Indonézia halo ataka no oho populasaun sira-ne’ebé deskonfia apoiante independénsia ne’ebé halibur malu iha Polísia Resort (POLRES), nune’e oho ema hamutuk na’in-13.

Timoroan hirak ne’e mak hanesan: Manuel Barros, Julião Barros, Domingos Gonçalves Perreira, José da Costa Guterres, José Abel, Francisco Paixão Fátima Martins, Martinho Marques, José Barros Soares, Lourenço dos Santos Gomea, Joaquim Monteiro Gonçalves, José Moniz da Cunha, Damião da Cruz no Daniel Barreto.

Masakre Mota Mulau

Iha Loron 9 setembru 1999, membru DMP no militár Indonézia oho tán ema na’in-13 ne’ebé halai sai hosi POLRES Maliana iha mota ida besik área Mulau. Ema hirak-ne’e oho iha fatin ne’e mak hanesan, Lamberto de Sá Benevides, Abílio Marques Vicente, Augosto dos Santos Marques, José Barreto, Pedro Luis, Lucas dos Santos, Luis Soares, Jerónimo Lopez, Domingos Titi Mau, Manuel Magalhães, Carlos Maia, Ernesto Coli no Paul da Silva.

Dadus ema lakon iha 1999 iha Bobonaro

Ema ne’ebé lakon hahú hosi fulan-janeiru to’o maiu hamutuk 52, fulan-jullu to’o agostu na’in-sia no agostu to’o outubru na’in-81, totál ema ne’ebé mate 142.

Jornalista: Sérgio da Cruz

Editór:Evaristo Soares Martins.

PUBLISIDADEiklan

HAKEREK NO HATÁN

Please enter your comment!
Please enter your name here