Autoridade munisipál Bobonaro hamutuk parseru sira komemora loron internasionál feto rurál 2021 ho tema “dezenolve feto rurál atu asegura ai-hán di’ak ba ema hotu”. imajen Agência TATOLI/Sérgio da Cruz.

BOBONARO,14 outubro 2021 (TATOLI)— Autoridade munisípiu Bobonaro hamutuk ho parseru importante sira, lansa ona grupu traballu téknika ba merkadu seguru no sidade seguru.Autoridade munisipál Bobonaro lansa programa refere tanba apoia hosi TOMAK (To’os ba Moris Di’ak), kinta, organiza workshop no halo  lansamentu ba estabelesimentu grupu traballu téknika ba inisiativa Maliana seguru no merkadu seguru, hodi komemora loron internasionál feto rurál 2021 ho tema “dezenvolve feto rurál atu asegura ai-hán di’ak ba ema hotu”.

Diretór Planeamentu Munisípiu Bobonaro, Simedio da Costa, esplika programa ne’e apoia hosi TOMAK atu dezenolve sidade Maliana sai fatin seguru ba ema hotu atu halo atividade iha fatin públiku, liuliu atividade negósiu iha merkadu Maliana, Maumali no Soso.

“Espera katak ba oin ita hotu hakarak atu kontribui no iha sentidu responsablidade atu apoia no halo intervensaun ba malu ho asaun ne’ebé konkreta tuir kompeténsia idak-idak nian, nune’e iha futuru Maliana sei sai sidade seguru no merkadu seguru ba ema hotu,” nia informa iha ámbitu komemorasaun loron internasionál feto, ne’ebé realiza iha salaun Maliana Brother, suku Lahomea.

Diretor ne’e nafatin husu apoia téknika hosi Governu Austrália nune’e programa ne’e bele la’o ho susesu tuir tarjetu ne’ebé parte hotu hakarak.

Iha biban ne’e,  Reprezentante Embaxadór Austrália atuál Koordenadora Dezenvolvimentu Rurál, Michelle Knight, kongratula prezidente autoridade Bobonaro, atu hadi’ak liután merkadu nune’e fornese espasu públiku nian ho seguru ba ema hotu-hotu.

Governu Australia sei kontinua apoia grupu ne’e liuhosi TOMAK atu fó asisténsia téknika hodi kontribui hadi’ak munisípiu Bobonaro, liuliu sidade Maliana.

“Ha’u haksolok boot tanba reprezenta governu Austrália ba iha lansamentu grupu traballu téknika ba iha Maliana seguru no merkadu seguru hodi haree ba prosesu dezenvolvimentu ba merkadu rua iha Maliana nia progresu, importante mak kontinua relasaun forti no dedikasaun ba serbisu hamutuk,” nia sujere.

Purtantu, Sekretária Estadu Igualdade no inkluzaun (SEII), Maria Jose da Fonseca de Jesus, agradese no fo gratidaun profunda ba autoridade Bobonaro no TOMAK ba inisiativa establesimentu grupu ne’e.

Tanba hosi programa ne’e bele promove  igualdade jéneru no halakon diskriminasaun hasoru feto, hodi fó oportunidade ba grupu feto sira-ne’ebé iha inisiativa harii grupu produtiva ho fatin ne’ebé seguru.

“Programa ne’e bele hakbiit feto sira-nia vida ekonomia no bele enkoraja feto sira sai badinas no partisipasaun ativa iha sira-nia atividade fila-liman ho seguru no asegura sira-nia dignidade,” hateten SEII.

“Susesu hosi inisiativa ne’e presiza entidade hotu nia serbisu hamutuk hodi kria fatin ne’ebé seguru inklui merkadu seguru, liuliu grupu risku sira bele hetan benifísiu hosi sira-nia fila-liman,” nia hameno.

Ministru Adminístrasaun Estatal, Miguel Pereira  de Carvalho, dezeja autoridade munisípal no grupu sira hotu, atu halo kooperasaun di’ak iha programa refere, hodi hametin kompetisaun saudável, armónia ba ema hotu iha merkadu laran sein konflitu.

“Ita hotu sei haree progresu no benifísiu reál hosi munisípiu ida-ne’e, tanba ne’e presiza asegura nafatin servisu ein-koordnada entre vendedór ho parte kompetente estadu nian katak iha entendimentu di’ak, rona malu, respeita ema hotu nia hanoin iha programa ida-ne’e,” nia apela.

Iha lansamentu ne’e, agrikultór sira aprezenta rezultadu produtu lokál sira, hanesan, liis, fehuk- ropa ne’ebé durante ne’e apoia hosi TOMAK.

Tuir observasaun Agência TATOLI, nota katak, atividade realiza tuir protokulu saúde no partisipa hosi instituisaun estadu nian iha munisípiu refere, ajénsia sira, organizasaun sosiedade sivíl, vendedór no grupu agrikultór sira.

Jornalista: Sérgio da Cruz

Editor: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here