Diretór Ezekutivu BNCTL, Brígido de Sousa. Imajen TATOLI/António Gonçalves

DILI, 14 outubru 2021 (TATOLI)–Banku Nasionál Komérsiu Timor-Leste (BNCTL, sigla portugés) halibur lukru millaun $4 hosi fulan-janeiru to’o setembru 2021, ne’ebé montante ne’e sa’e kompara ho tinan 2020 ne’ebé to’o de’it millaun $2,4.

“BNCTL iha lukru kada tinan, tanba banku ne’e Estadu nian, entaun pertense ba Estadu. Osan sira Governu bele foti, ne’ebé hosi lukru ne’e aumenta kapitál no osan sira direitu asionista nian. Estadu bele foti lukru ne’ebé BNCTL iha hodi sai evidénsia, maibé to’o agora Estadu ka Governu deside katak osan ne’ebé hanesan provit ne’e kontinua rai atu aumenta tan kapitál,” Diretór Ezekutivu BNCTL, Brígido de Sousa, informa ba Agência TATOLI, foin lalais ne’e, iha ninia knaar fatin, Mandarin.

Notísia relevante: BNCTL sosa mákina unidade 100 atu fasilita kliente halo transasaun

Tuir Jerente banku, maski Timor-Leste hasoru pandemia no afeta ba ekonomia rai-laran, maibé BNCTL la sofre no kontinua fó kréditu ba kliente.

“Felizmente to’o agora ladún sofre hosi pandemia, bele dehan maski situasaun difisil hasoru pandemia no dala ruma akontese serka sanitária no konfinamentu domisiliáriu.  Loloos lori impaktu tanba negósiu sira paradu hotu, maibé to’o agora BNCTL la hasoru situasaun ida a’at loos,” nia akresenta.

Iha situasaun sira ne’e, BNCTL kontinua fó kréditu to’o millaun $90 iha tinan 2020 no besik millaun $70 iha tinan ne’e, ne’ebé kréditu sei ativu hela desde janeiru to’o setembru 2021 hamutuk millaun $644.

“Signifika maski situasaun difisil, maibé atendimentu banku fó kréditu, tantu ba negósiu, konsultivu, no projetu la’o nafatin. Sobre taxa kréditu má paradu ka ladún selu kréditu mós la boot, to’o 2% de’it,” nia dehan.

Aleinde ne’e, Banku Nasionál ne’e konsege mobiliza depózitu millaun $180 iha tinan 2020 no millaun $400 iha tinan ne’e.

Iha orsamentu 2021, Governu kapitaliza BNCTL millaun $40 atu fó empréstimu ba ema no empreza sira, nune’e evita labele monu ba falénsia no sei estimula entidade hirak ne’e hodi sustenta kompra, traballadór no halo investimentu.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here