Jogadór AKADEMICA FC kamizola metan kontrola hela bola bainhira ho AS MARCA iha joga divisaun II, Liga Futeból Timor-Leste, kinta 14 Otubru 2021 iha Estádiu Munisipál Dili, Imajen Tatoli/António Gonçalves

DILI, 14 outubru 2021 (TATOLI)- Ekipa Universidade Nasionál Timor Lorosae (UNTL) ho naran istimadu Académica FC konsege “liki” nia adversáriu AS Marca FC ho golu úniku iha jogu kontinuasaun Liga Futeból Timor – Leste (LFTL) Segunda Divizaun kinta loraik ne’e iha Estadiu Munisipál Dili.

Ekipa Académica ne’ebé lidera hosi nia treinadór Luisino dos Santos hatudu duni prova ba nia adeptu sira tanba iha jornada primeiru konkista kedan vitória ba nia ekipa hodi hadau kedan pontu tolu hosi ekipa adversáriu ne’ebé lidera hosi treinadór Eduin Belo.

Hanesan baibain menutu da-uluk hahú ekipa rua tenke fó kontra no atake ba malu tuir tékniku no abilidade ekipa ida-idak nian liuhosi duir bola hosi ain ba ain iha kampu kuadradu nia laran.

Rame liutan iha jogu ne’e hodi fó suporta ba jogadór sira atu labele baruk hala´o jogu. Iha tribun leten parte loromonu enfrenta kedan ho adeptu sira hosi parte rua nian haklalak durante jogu hahú to’o remata.

Ekipa Académica hala´o jogu ofensivu hodi halo kontra atake makas iha liña oin Marca nian. Maibé Marca mós la nonok de’it maibé responde ho kontra atake halo bola long atu buka hatama golu lalais, maibé ekipa rua nia avansadu falla hotu tanba la konsege ezekuta oportunidade sira ho di’ak nune’e to´o menutu 45 termina laiha golu ruma mak akontese nune’e ekipa rua hela ho 0-0.

Hakur ba segunda parte ekipa rua nafatin halo kontra no atake ba malu maibé forsa entre ekipa rua nafatin hanesan laiha diferente. Hare ba situasaun ne’e treinadór Académica la nonok de’it halo mudansa imediatamente ba tékniku jogu iha menutu 51 nia dada sai jogadór avansadu Denisio da Costa (11) hodi substitui fali Juvinal Boavida (19).

Hosi mudansa ne’e la hela de’it hanesan mudansa tanba prejensa Juvinal nian ne’e lori duni sorte ba Acedémica tanba tama ho tama defeza Marca nian halo falta iha rede oin fó biban kedan ba árbitru hú árbitu deside fó penalidade ba Acedémica.

Jogadór AKADEMICA FC kamizola metan hadau-malu bola ho jogador AS MARCA iha joga divisaun II, Liga Futeból Timor-Leste, kinta 14 Otubru 2021 iha Estádiu Munisipál Dili, Imajen Tatoli/António Gonçalves

Iha penalidade ne’e Juvinal mak iha konfiansa boot hodi ezekuta, bainhira tiru bola halo guarda rede Marca hosi Alves (31) la konsege antisipa halo didiak no bola konsege halo nakdoko rede muda kedan rezultadu metin ba 1-0.

Jogu sai manas liutan ba ekipa rua, suta barak mak avansadu Marca lansa maibé la kona iha alvu too menutu ikus termina laiha tan golu ruma mak akontese ba ekipa rua no vitória hela metin kedan ba Académica ho pontu tolu iha tabela klasifikasaun provijóriu no Marca hela ho zero hodi hein jogu seluk tuir mai.

Jogu ne’e dirije hosi arbitru Eufrasio Silva, juiz lina Elisio Lopes, Emeliano de Araujo no arbitru rezerva Januario Salsinha.

Notísia relevante: Kablaki FC “hakru’uk” kontra Santa Cruz FC

Jornalista: Hortencio Sanchez

Editór: Florencio Miranda Ximnes

PUBLISIDADEiklan

HAKEREK NO HATÁN

Please enter your comment!
Please enter your name here