Sekretáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Egas Cristóvão.

DILI, 13 outubru 2021 (TATOLI)—Sekretáriu Estadu Komunikasaun Sosiál (SEKOMS), Merício Juvinal ‘Akara’, kuarta ne’e halo abertura ba kampaña nasionál kombate hoax, promove internet saudavel faze daruak ba nível munisípiu.

Notísia Relevante: SEKOMS lansa kampaña nasionál kombate hoax hahú hosi Lautem

“Ohin ita lansa kampanã ba daruak. Fulan kotuk ita lansa kampaña nível munisípiu ba dahuluk hahú iha munisípiu Lautem no ohin ita ba fali munisípiu Manufahi. Kampaña ne’e, ho objetivu hakarak enkoraja ita-nia sidadaun sira iha nível munisípiu atu kontribui ba kampaña nasionál kombate Hoax tanba durante ne’e hoax buras hela iha ita-nia leet no ita-nia Nasaun,” Merício Juvinal ‘Akara’ hateten ba jornalista sira, iha Palácio do Governu.

Lansamentu ohin ne’e, foku ba oinsá promove internet saudavel la’os de’it kombate hoax maibé iha tempu hanesan tenke promove internet saúdavel, liu-liu ba labarik sira-ne’ebé idade sei kiik sira- ne’e bele asesu internet ho pozitivu.

Tanba, nia dehan, agora daudaun internet no plataforma dijitál ne’e bele asesu iha fatin-fatin maibé se la kuidadu ho didi’ak, labarik sira la’ós asesu de’it informasaun pozitivu maibé informasaun negátivu mós barak.

“Iha ema balun aproveita fila-fali plataforma dijitál hodi lansa informasaun falsu (hoax) no ita mós haree ema lansa ponográfia. Entaun, ida-ne’e ita tenke hahú prepara ita-nia sidadaun para iha matenek hodi utiliza internet ho sauudavel,” nia hateten.

Plataforma dijitál ne’e agora importante ba Timor-Leste maibé Governu iha responsabilidade atu prepara sidadaun sira hodi utiliza plataforma dijitál ne’e ba sivilizasaun di’ak ba Nasaun, nune’e sidadaun sira bele sai matenek liután no koñese mundu hodi dezenvolve Timor-Leste.

“Durante ne’e ita akompaña no ita halo analize didi’ak, sidadaun katak barak mak uza sala tiha internet. Uza salah iha kontestu lansa informasaun falsu no asesu fali informasaun ne’ebé negativu,” nia dehan.

Tanba ne’e, nia dehan, Governu iha responsabilidade atu proteje nia sidadaun ne’e la’ós ba sidadun sira iha Dili de’it, maibé sidadaun sira iha munisípiu hotu, atu bele kombate lia falsu no informasaun negativu sira-ne’e.

“Ohin, ita konsentra fali ba munisípiu Manufahi, atu ita enkoraza sidadaun sira katak tempu ona sira kontribui ba kombate hoax hodi konsumu de’it informasaun ne’ebé loos ho lia-loos. Espesiálmente, iha kampaña vasinasaun ne’e, Governu liuhosi ministériu saúde bele enkoraza sidadaun sira hodi simu vasina no labele rona lia falsu hosi ID falsu sira,” nia dehan.

Iha kampaña ba kombate hoax ne’e, autoridade munisípiu sei kontinua halo kampaña iha postu administrativu no suku sira, maibé sei akompaña hosi Sekretáriu Estadu Komunikasaun Sosiál, liuhosi programa naroman ba suku.

Ho lansamentu kampaña nasionál kombate hoax no internet sauudavel ne’e, marka prezensa hosi oradór na’in-tolu ne’ebé reprezenta hosi Ministériu Saúde (MS), Sosiedade Sívil no mós hosi SEKOMS.

 Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here