Lia-na'in Eugénio Sarmento. Imajen Tatoli/Osória Marques.

DILI, 13 outubru 2021 (TATOLI)—Diretór Jerál Sekretáriu Estadu Arte no Kultura (SEAK), Manuel Ximenes Smith, hateten SEAK atribui sertifikadu apresiasaun ba Koordenadór Jerál lia-na’in Timor-Leste, ho objetivu atu halo identifikasaun ba lia-na’in sira iha territóriu nasionál.

“Apresiasaun ba lia-na’in sira iha Timor-Leste ne’e, orientasaun hosi Primeiru-Ministru mai SEAK katak hahú agora ita komesa halo identifikasaun ba lia-na’in sira iha territóriu nasionál. Tanba, iha COVID-19 ne’e, partisipasaun hosi lia-na’in sira halo serimónia rituál atu satan netik COVID-19 mós maka’as. La’os ida-ne’e de’it, maibé buat barak mak lia-na’in Timor-Leste fó apoia ba iha prosesu dezenvolvimentu nasionál,” Manuel Ximenes Smith hateten ba jornalista sira iha nia knaar-fatin, Avenida Portugal, Dili, kuarta ne’e.

Nia dehan, ohin inisia ona fó apresiasaun simbolikamente ho koordenadór jerál lia-na’in Timor-Leste, no daudaun ne’e SEAK halo prosesu identifikasaun ba lia-na’in iha territóriu nasionál hodi bele halo atribuisaun sertifikadu ba lia-na’in sira.

Iha sorin seluk, Koordenadór Jerál lia-na’in Timor-Leste, Eugenio Sarmento agradese ba Governu tanba bele atribui ona sertifikadu apresiasaun ba lia-na’in sira iha Timor-Leste.

“Fuan agradesidu tebes tanba foin primeira vez ofisiálmente Governu liuhosi Sekretáriu Estadu Arte no Kultura valoriza ami liuhosi sertifikadu ne’ebé foin ha’u simu,” nia dehan.

Tuir nia, papél lia-na’in boot tebe-tebes tanba se lia-na’in laiha mak fatin sira iha área rurál no munisípiu sira mak iha problema, bainhira lia-na’in la rezolve lmak kadeia sira-ne’ebé iha sei la to’o atu sulan kriminózu sira.

“Problema barak iha munisípiu no iha fatin rurál la mai to’o iha Polísia no Xefe Suku, maibé lia-na’in sira mak rezolve iha uma lisan no iha familia ida-idak. Maibé, krime ne’e lia-na’in sira labele rezolve, tanba krime ne’e tribunal n]mak tenke deside tuir lei,” nia hateten.

Maibé, papél hosi lia-na’in la’os de’it mak hamulak no halo de’it serimónia tradisionál, maibé papél importante lia-na’in nian mak tesi-lia ba problema kiik-oan no boot sira iha suku laran mak sei kontribui ona ba dezenvolvimentu dame nian.

“Se lia-na’in laiha, kadeia iha Díli laran sulan ema la to’o. Tanba buat barak sira rezolve tiha ona iha rurál. Iha subdistritu barak liu la to’o iha polísia no la to’o iha administradór sira, tanba barak liu ema rezolve familiár ka rezolve tuir lisan mak hanesan fó multa ba malu no fó sala ba malu. Buat sira hanesan ne’e mak parte ida hosi rezolve kestaun konflitu iha baze,” nia informa.

Serimónia atribuisaun sertifikadu apresiasaun ba koordenadór jerál lia-na’in Timor-Leste ne’e, atribui hosi Sekretáriu Estadu Arte no Kultura (SEAK), Teófilo Caldas.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here