Mapa munisípiu Viqueque. Imajen/Espesiál

VIQUEQUE, 13 Outubru 2021 (TATOLI)–Bazeia ba dadus Protesaun Sivil Viqueque, dezastre naturál ne’ebé akontese iha marsu to’o juñu 2021, iha postu Viqueque Villa, Lakluta no Ossu, halo uma-kain 1.363 mak sai vítima, ne’ebé hosi totál ne’e iha uma 115 mak hetan estragu.

“Dadus sira hato’o ona ba nasionál. Maioria komunidade ne’ebé hela besik iha mota Wetuku suku Bikarin no mota Kuha área Olobai iha postu Viqueque villa ninin mak sai vítima. Hosi postu rua Lakluta no Ossu, anin sobu uma tanba sira hela iha foho leten,” Koodenadór Protesaun Sivil Viqueque, Cerilo Soares Gomes, informa ba Agência TATOLI, iha suku Bahalara Uain, Viqueque, kuarta ne’e.

Tuir Koordenadór, tanba komunidade hela besik mota ninin no balun iha foho leten, bainhira iha tempu udan no anin boot fasil atu hetan risku dezastre, tanba ne’e presiza iha intervensaun Governu liuhosi prevensaun, mitigasaun no sensibilizasaun. 

Iha biban hanesan, Administradór munisípiu Viqueque, Januário Soares ‘Boly’, relata, iha suku rua iha Viqueque mak hetan impaktu maka’as dezastre naturál.

“Tinan ne’e abitante hosi postu lima afeta hotu dezastre naturál, maibé afeta maka’as liu iha postu Viqueque Villa iha suku Bahalara Uain no suku Bibileo,” Autoridade munisipál ne’e dehan.

Dezastre naturál ne’ebé kada tinan sempre akontese iha Viqueque maka anin boot no udan boot, ne’ebé halo mota tun maka’as hodi afeta ba komunidade nia hela fatin.

“Tanba ne’e, parte Governu presiza sensibiliza komunidade lokál hodi minimiza risku. Ami mós apela ba komunidade ne’ebé hela besik iha mota ninin hodi evita risku sira,” nia akresenta.

Aleinde ne’e, tuir Autoridade munisipál ne’e, presiza mós sensibiliza autoridade suku hodi prepara fatin ba komunidade sira ne’ebé hela iha fatin risku sira.

Nune’e mós, Vítima dezastre hosi aldeia Failai, suku Uma Tolu, João da Cruz, haktuir, udan boot no anin boot iha tinan 2020, subu totál nia uma, maibé foin lalais Governu fó apoiu materiál hodi konstrui uma.

Notísia relevante: Vítima dezastre naturál 98 iha Viqueque simu ona materiál konstrusaun

“Ha’u sai vítima ba dezastre naturál, mosu udan ho intensidade boot no anin  sobu hau-nia uma to’o tohar, maibé ha’u agradese ba Governu tanba fó ona apoiu materiál ba ha’u hodi kontrui fali hau-nia uma,” nia akresenta.

Jornalista : Vitorino Lopes da Costa

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here