Amu Vigáriu Viqueque, Tiago da Costa. Imajen TATOLI/Vitorino Lopes da Costa

VIQUEQUE, 13 outubru 2021 (TATOLI)—Relasiona ho komemorasaun loron mundiál redusaun risku dezastre ohin loron, Amu Vigáriu Viqueque, Tiago da Costa, husu sarani Viqueque hadomi natureza hodi labele afeta maka’as ba risku dezastre bainhira akontese.

“Ita nafatin tau importánsia ba natureza no tenki hadomi natureza iha ema ida-idak ninia fatin no ita mós husu ba Na’i Maromak nia tulun hodi proteje ita hosi risku dezastre naturál,” Amu Tiago da Costa, hato’o iha misa agradesementu ba komemorasaun loron mundiál redusaun risku dezastre, iha kapela Kaiju Laran, suku Bahalara Uain, Viqueque, kuarta ne’e.

Notísia relevante: Viqueque sai uma-na’in ba komemorasaun loron internasionál redusaun risku dezastre

Amu selebrante ne’e husu mós ba Governu liuhosi Sekretaria Estadu Protesaun Sivil (SEPS) atu tau-matan nafatin ba risku dezastre sira inklui ema ne’ebé sai vítima.

“Natureza eziji hela ita, dala barak halo konstrusaun ruma, entidade Estadu sira tenki tau importánsia ba natureza. Ita bele ko’alia dezenvolvimentu maibé ita la respeita natureza no ita rasik maka sobu natureza, hafoin afeta ba ita-nia povu,” nia akresenta.

Nia nota katak, dezastre mosu dala ruma mai husi ema-nia hahalok, tanba ne’e komunidade no Governu tenki konserva natureza ho di’ak hodi labele fó afeta ba ema barak.

Hafoin partisipa misa, Sekretáriu Estadu Protesaun Sivil, Joaquim José Gusmão dos Martins, agradese ba Amu selebrante.

“Ha’u lori Governu nia naran agradese ba Amu selebrante ho ninia omília ne’ebé hafanun tebes ita hotu, liuliu Governu hodi bele atensaun liután ba dezastre hodi bele hatene akontesementu reál iha kampu,” nia adehan.

Hafoin ramata misa, kontinua kari ai-funan iha Crúz boot iha suku Bahalara Uai,  hodi refleta ba ema sira ne’ebé mate ba dezastre.

Iha ámbitu kari ai-funan no sunu lilin, hetan partisipa hosi Administradór munisípiu Viqueque, Januario Sores ‘Boly’, reprezentante hosi liña ministeriál, autoridade suku, komunidade lokál no entidade relevante sira.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here