Pesoál saúde fó hela vasina ba komunidade postu administrativu Balibo, munisípiu Bobonaro. Imajen Agência TATOLI/Sérgio da Cruz.

BOBONARO,13 outubro 2021 (TATOLI)— Komunidade postu administrativu Balibo, munisípiu Bobonaro, hamutuk 1.366 mak seidauk simu vasina AstraZeneca.

“Ita-nia alvu ne’e 9.233 hosi totál ne’e simu ona doze dahuluk hamutuk 4.893 no doze kompleta hamutuk 2.974. Hosi ema hirak-ne’e na’in 1.366 de’it mak to’o agora seidauk simu vasina, maibé daudaun ne’e atinje 85.21%,” Xefe Sentru Saúde Balibo, Manuela Mau Laca da Cruz, informa ba jornalista sira, iha nia kna’ar-fatin, Balibo, kuarta ne’e.

Reponsável Sentru Saúde ne’e haktuir, dezde implementasaun vasina iha loron 12 fulan-abríl to’o fulan-outubru populasaun hosi suku neen kompostu Balibo vila, Batugade, Cová, Leolima, Leohitu no Sanirin la’o ho di’ak.

Programa kampaña vasinasaun ba suku Balibo vila ho alvu 2.351, nune’e simu ona vasina totál 2.549. Hosi númeru ne’e 108.40% simu ona vasina. Signifika ema 198 mak liu ona tarjetu.

Hosi parte suku Batugade, alvu 1.528 no simu ona vasina 1.924 (125.92%), liu ona ona tarjetu hamutuk ema na’in 396. Suku Cová alvu 1.025, simu ona vasina 444 (43.32%) no falta ema na’in-581 mak seidauk simu vasina.

Suku Leolima populasaun alvu 1.269, simu ona vasina 660 (47,28%) no falta 669 mak seidauk simu vasina.

Iha parte suku Leohitu, populasaun alvu 1.772, simu ona vasina 979 (53.33%), falta 793 mak seidauk simu vasina.

Enkuantu suku Sanirin alvu 1.288, na’in 1.371 simu ona vasina (106,44%). Hosi númeru ne’e ema na’in-83 liu ona tarjetu.

“Hosi suku neen ne’e, Leolima, Cowa no Leohitu mak persentajen kiikliu tanba komunidade ladún partisipa másimu. Ita ba suku Cowa, aldeia Railuli ne’e balu lakohi koopera, dalaruma halai subar tiha, ida ne’e mak sai problema ba ami,” nia haktuir.

Enkuantu dadus kada kategória, pesoál saúde doze dahuluk hamutuk 40 no doze daruak 42, liña frente seluk doze dahuluk 621 no doze daruak 466.

Idade 60 ba leten ne’ebé simu doze dahuluk ema na’in-697, kompleta ona doze 324. Ba sira-ne’ebé ho komorbilidade doze dahuluk 202, kompleta doze daruak 88, no sidadaun la ho komorbilidade doze dahuluk hamutuk 3.333 no kompleta doze 2.054.

“Hosi numeru ne’e ita sura kada seksu, mane hamutuk 4.375 ho totál 55.6% no feto 44.4% mak simu ona vasina AstraZeneca,” nia esplika.

Jornalista       : Sérgio da Cruz

Editór             : Evaristo Soares Martins

HAKEREK NO HATÁN

Please enter your comment!
Please enter your name here