Prezidente Autoridade Rejiaun Administrativa Espesiál Oe-Cusse Ambeno (RAEOA), Arsénio Paixão Bano. Imajen Tatoli/Francisco Sony

OÉ-CUSSE, 13 outubru 2021 (TATOLI)— Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, fó-sai katak, karreta funeráriu iha enklave avaria hela no oras ne’e halo hela manutensaun iha ofisina.

“Neste mumentu ita-nia karreta funeráriu rua avaria hela, sei halo hela manutensaun. Empreza sei halo manutensaun, entaun serbisu la’o atraza uitoan, maibé bainhira halo hotu manutensaun karreta rua ne’e funsiona fila-fali. Autoridade sei arranja tán karreta funeráriu ida atu halo atendimentu iha Oé-Cusse,” Arsénio Paixão Bano, informa ba jornalista sira iha edifísiu ZEESM, RAEOA, kuarta ne’e.

Prezidente Autoridade RAEOA ne’e klarifika, akontesimentu tula mate-isin iha karreta hilux ne’e, tanba parte solidariedade sosiál simu pedidu urjente hosi família matebian atu transporta mate-isin hosi ospitál ba foho.

Nia dehan, iha momentu ne’e karreta funeráriu avaria hela, nune’e ekipa tékniku sira prepara karreta Estadu hilux ida, atu fó tulun ba familia mate-isin transporta mate-isin ba sira-nia hela-fatin.

“Akontese hanesan ne’e urjente, no karreta karreta funeráriu avaria hela, entaun mate-isin labele tula hosi vila to’o foho, entaun tékniku sira deside prepara karreta Estadu hilux ida, atu fasilita tula mate-isin ba to’o hela-fatin, importante ita fó apoiu ho dignu,” nia klarifika.

Xefe Departamentu Solidariedade Sosiál no Inkluzaun (DSSI-RAEOA), Adelino Cau, informa, Oé-Cusse iha karreta funeráriu unidade rua, maka durante ne’e hala’o operasaun iha Oé-Cusse avaria hela, nune’e DSSI prepara karreta Estadu hilux ida hodi tula mate-isin, bainhira hetan pedidu urjénsia hosi komunidade.

Nia rekoñese, komunidade barak mak lamenta no hato’o sentimentu hirus liuhosi mídia sosiál, kona-ba parte sosiál tula mate-isin iha karreta hilux, maibé nia husu atu pasiensia, tanba daudaun ne’e parte tékniku sira sei esforsu halo manutensaun nune’e iha tempu badak bele halo ona operasaun hanesan bainbain.

“Ami rekoñese tanba karreta aat, maibé ita hatama ona iha ofisina hodi halo operasaun tanba avaria besik fulan-ida ona. Ita espera iha fulan-oin bele funsiona fila-fali atu fó atendimentu ba komunidade, liuliu iha ospitál atu tula mate-isin,” nia klarifika.

Tuir nia, karreta funeráriu nia ekipamentu balu sei mai hosi Dili no balu hosi Indonézia, tanba ne’e mak prepara karreta Estadu hilux ida provizóriu halo operasaun uza atu tula mate-isin.

Jornalista         : Abílio Elo Nini
Editór               : Evaristo Soarés Martins

PUBLISIDADEiklan

HAKEREK NO HATÁN

Please enter your comment!
Please enter your name here