Sekretáriu Estadu ba Asuntu Kombatente no Libertasaun Nasionál, Gil da Costa Monteiro ‘Oan Soru’. Imajen TATOLI/Egas Cristóvão

DILI, 13 outubru 2021 (TATOLI)–Sekretáriu Estadu ba Asuntu Kombatente no Libertasaun Nasionál, Gil da Costa Monteiro ‘Oan Soru’, iha kuarta ne’e, relata kestaun rua ba Prezidente Repúblika, Francisco Guterres ‘Lú Olo’, relasiona ho veteranu.

Iha biban ne’e, parte rua ko’alia kona-ba falsifikasaun dokumentu sai veteranu no abitasaun ba vereranu tinan 24 hamutuk 117.

“Kona-ba falsifikasaun dokumentu, ita-nia ekipa deteta barak, hahú hosi janeiru 2008 to’o mai ohin loron ita hapara ema simu pensaun veteranu hamutuk 2.088 iha territóriu tomak,” Sekretáriu Estadu, informa, hafoin hasoru malu ho Xefe Estadu, iha Palásiu Prezidensiál, Nicolau Lobato, Aitarak-laran.

Notísia relevante: Governu Halo Ona Regulamentu ba Pensaun Veteranu

Benefisiáriu ba pensaun veteranu no martir iha territóriu tomak hamutuk 28.558, kompostu hosi Aileu 1.395, Ainaro 2.206, Baucau 4.136, Bobonaro 2.528, Covalima 1.424, Dili 2.119, Ermera 3.623, Lautém 2.420, Liquiçá 1.419, Manatuto 2.141, Manufahi 1.456, Oé-cusse 404, Viqueque 3.256 no sidadaun timor-oan ne’ebé hela iha estranjeiru hamutuk 28.

Pensaun ba antigu kombatente hatuur ona iha dekretu-lei númeru 3/2006 no alterasaun dahuluk dekretu-lei 9/2009 estatutu kombatente libertasaun nasionál hodi fó rekoñesementu ba sidadaun hotu ne’ebé partisipa iha prosesu luta ba libertasaun nasionál.            

Enkuantu, kona-ba atribuisaun abitasaun veteranu tinan 24, iha tinan 2020 hamtuk na’in-117.

“Balun Governu halo ona inaugurasaun no ami rasik partisipa diretamente, enkuantu seluk prosesu konstrusaun uma foin 10% to’o 20% tanba impaktu impozisaun konfinamentu domisiliáriu obrigatóriu no serka sanitásria ne’ebé difikulta,” nia hateten.

Notísia relevanteKonsellu Veteranu husu kombatente uza osan halo uma ho responsabilidade

Governu apoia osan $40.000 ba kada veteranu ne’ebé dedika-an durante tinan 20 to’o 24 ba luta independénsia nasionál, hodi konstrui uma, ne’ebé transfere ba idaidak ninia konta bankária.

Objetivu kontrusaun uma ba veteranu atu dignifika sira-nia dedikasaun, ne’ebé bainhira funu hotu iha tinan 1999, fila mai villa-laran laiha fatin hodi hela, tanba ne’e Governu halo programa hodi konstrui uma.

Antes ne’e, prevee orsamentu ba konstrusaun uma veteranu hamutuk 60 ne’ebé korresponde ho totál orsamentu millaun $2,4 maibé ikus mai aumenta ba uma hamutuk 96.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here