Komemorasaun loron mundiál redusaun risku dezastre iha suku Bahalara Uain, kuarta (13/10). Imajen TATOLI/Vitorino Lopes da Costa

VIQUEQUE, 13 outubru 2021 (TATOLI)–Sekretáriu Estadu Protesaun Sivil (SEPS), Joaquim José Gusmão dos Reis Martins, hateten, komemorasaun loron mundiál redusaun risku dezastre ohin loron bele fó hanoin di’ak liután ba komunidade kona-ba risku dezastre, nune’e bele iha medida prevensaun sedu.

Komorasaun ba tinan ne’e Timor-Leste hili tema ‘Hamutuk ba hametin hodi harii komunidade reseliente dezastre iha Timor-Leste’, no selebra iha hili suku Bahalara Uain, munisípiu Viqueque, ho simulasaun dezastre naturál no atividade seluk relasiona ho loron ne’e.

“Komunidade iha suku Bahalara Uain, Viqueque, afeta hotu ba dezastre naturál ne’ebé foin lalais akontese, tanba ne’e Governu deside selebra iha ne’e hodi hasa’e liután komunidade nia koñesimentu no prepara komunidade hasoru dezastre no jere risku,” Sekretáriu Estadu informa iha suku Bahalara Uain, kuarta ne’e.

Aleinde ne’e, Governu planeia kria ona mitigasaun no prevensaun dezastre hodi bele minimiza risku.

Iha fatin hanesan, Administratradór munisípiu Viqueque, Januario Sores ‘Boly’, agradese ba Governu sentrál ne’ebé deside komemora loron mundiál redusaun risku dezastre naturál.

“Iha Viqueque dezastre kada tinan akontese, tanba ne’e ohin ita kria mós simulasaun dezastre naturál. Ida-ne’e bele hatudu ba komunidade hodi bele kompreende bainhira mosu dezastre komunidade sira bele salva-an,” nia dehan.

Iha komemorasaun ne’e, distribui sertifikadu ba vítima dezastre naturál sira ne’ebé konsege harii fila ninia uma no ba kestaun ne’e Governu fó apoia materiál konstrusaun uma.

Komemorasaun loron mundiál ne’e partisipa hosi komunidade lokál no entidade relevante seluk.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here