Diretór Ezekutivu BNCTL, Brígido de Sousa. Imajen TATOLI/Francisco Sony

DILI, 13 outubru 2021 (TATOLI)—Banku Nasionál Komérsiu Timor-Leste (BNCTL, sigla portugés) kontinua atualiza atendimentu ba kliente, nune’e iha faze dezenvolve sistema pagamentu scanning matan.

Fasilidade bankária ne’e liuhosi kooperasaun entre BNCTL no empreza Iris Guard iha loron 05 outubru 2021, ne’ebé parseria ho Eye Trust LDA, ne’ebé hanesan empreza internasionál ne’ebé nia sede sentrál iha Inglatera.

“Empeza Iris Guard fornese ekipamentu scaning ba ita-nia matan hodi halo tranzasaun. Akordu kooperasaun hala’o ona, maibé presiza tempu ba preparasaun no dezenvolve sistema, karik buat hotu la’o di’ak, iha inísiu tinan 2022 bele hahú prodús sistema biométriku ne’ebé fornese hosi iris guard iha Timor-Leste,” Diretór Ezekutivu BNCTL, Brígido de Sousa, informa ba Agência TATOLI, iha ninia knaar fatin, Mandarin, kuarta ne’e.

Iris Guard hanesan empreza boot iha mundu, ne’ebé uza sistema biométriku, ba kontaktu liman-fuan, oin, no matan hodi identifika identidade kliente.

“Uza teknolojia scaning matan, konforme estudu hanesan biométriku ne’ebé seguru liu ona, enkuantu uza liman, bainhira ema ruma nia liman kanek ruma, entaun sistema mákina labele rekoñese, maibé ba matan, maski uza ókulu mós bele deteta nafatin,” nia akresenta.

Nune’e, ekipamentu hosi iris guard liuhosi BNCTL, sei instala hodi kliente sira uza matan mak hateke ba mákina hodi bele halo tranzasaun.

“Ezemplu kaer telemóvel hodi tau ba matan no scan, ka atu halo tranzasaun ruma iha internet banking la presiza hatama password, uza matan de’it, maibé tenke instala sistema refere,” nia esplika.

Sistema scanning matan fasilita liu kliente idozu no invalidez

Empreza ne’e daudaun ninia serve ho kapasidade boot iha sede sentrál, ne’ebé kada loron bele simu transaaun liuhosi scanning matan ba kliente hamutuk biliaun 2,5 iha nasaun tomak ne’ebé uza sistema ne’e.

“Intensaun hosi kooperasaun ne’e maka fasilita kliente BNCTL, liuliu idozu no invalidez inklui bolsa mãe, hodi hetan atendimentu lalais. Ezemplu, bainhira Banku Nasionál atende pagamentu kliente baibain, idozu no bolsa da mãe, dala ruma hanehan de’it liman, no kliente sira mai to’o banku tenke asina,” Responsável Banku Nasionál ne’e esplika.

Kliente BNCTL durante ne’e barak mai hosi idozu no invalidez ne’ebé simu subsídiu hosi Governu no hetan pagamentu hosi Banku Nasionál, ne’ebé ho totál 91.717 iha territóriu tomak ho totál pagamentu ba fulan-tolu millaun $16.

Maski nune’e, tuir Direjente Banku ne’e, sei presiza tempu to’o estabelese sistema.

“Atendimentu sira dala ruma ita haree iha situasaun daudaun ho dijitalizasaun ne’ebé la’o iha mundu, iha servisu bankária ne’e saida mak ita halo daudaun ne’e la’ós tempu ona,” nia dehan.

BNCTL iha relasaun korresponde ho planu ba dijitaliza servisu bankáriu, hodi muda servisu  manuál ba automatizadu, ne’ebé agora daudaun hahú ona introdús kartaun ATM P24 no internet bangking.

Notísia relevante: BNCTL Integra Ona ho P24

Hanesan Iris Guard ne’e atu fasilita kliente sira bele halo tranzasaun ba banku ho lalais, fasil no seguru liu.

“Tanba durante ne’e bainhira halo pagamentu ba kliente sira tenke mai iha balkaun, asina ka balun hanehan liman. Entaun, iha risku falsifikasaun sistema ida ne’e, maski la’ós foun maibé iha Ázia nasaun tolu de’it mak uza inklui agora Timor-Leste,” Diretór Ezekutivu BNCTL esplika.

Sistema scaning matan hanesan meiu ka sistema banku ne’ebé bele identifika ema ida hanesan kliente banku.

Sistema ne’e ho kustu millaun $1, ne’ebé empreza sei fornese ekipamentu no programa ba implementasaun.

“Sistema ne’e la’ós úniku opsaun, maibé banku presiza oferese opsaun ba kliente sira maski la’ós mandatóriu, kliente sé de’it bainhira halo tranzasaun liuhosi sistema ne’e, bele ka prefere liu ba to’o balkaun banku hodi asina hafoin halo tranzasaun, depende de’it ba ema idaidak,” nia dehan.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here