Pesoál saúde fó vasina ba abitante sira iha postu vasinasaun iha Viqueque, kuarta (13/10). Imajen TATOLI/Vitorino Lopes da Costa

VIQUEQUE, 13 outubru 2021 (TATOLI)—Bazeia ba dadus atuál, munisípiu Viqueque iha ona persentajen boot ba partisipasaun kampaña vasina, enkuantu abitante elejível (idade 18 ba leten) 21,9% maka seidauk simu vasina ba prevensaun COVID-19, nune’e ekipa trasa estratejia hodi tama-sai abitante sira-nia uma hodi fó vasina.

“Ami hahú horiseik no ohin, ekipa pesoál saúde tun ba abitante sira-nia uma hodi fó vasina ba hirak ne’ebé seidauk simu,” Diretór Servisu Saúde munisípiu Viqueque, Francisco de Carvalho, informa ba Agência TATOLI, iha Viqueque villa, kuarta ne’e.

Notísia relevante: Rezultadu kampaña vasinasaun, Viqueque atinje %78.1

Tuir dadus vasina iha Viqueque, partisipasaun vasina doze dahuluk 34.325 reprezenta 78,1%, doze daruak 21.231 reprezenta 48,3%.

Nune’e, totál ema ne’ebé seidauk vasina maka Lacluta 8,8%, Ossu 27,8%, Uatucarbau 28,8%, Uatulari 22,1%, Viqueque 19,2%, ne’ebé akumula abitante 9.614 seidauk simu vasina, reprezenta 21,9%.

Ekipa saúde sei kontinua tama-sai uma ne’e fulan-outubru nia rohan atu konvense komunidade partisipa másimu iha kampaña imunizasaun iha ámbitu pandemia.

Aleinde ne’e, parte Servisu Saúde munisipál presiza apoiu autoridade kompetente hodi mobiliza komunidade.

“Ami-nia pesoál saúde hosi postu lima tun ba komunidade nia fatin atu haree liu aldeia sira ne’ebé maka númeru vasina kiik no iha pesoál saúde balun maka hein iha sentru saúde sira. Ha’u fiar ho estratejia ne’e, ita bele konvense komunidade, maibé parte autoridade munisipál no líder komunitáriu mós presiza envolve hodi halibur komunidade iha fatin ida pesoál saúde tun ba vasina. Ita la presiza tama-sai uma,” nia dehan.

Antes ne’e, Administradór munisípiu Viqueque, Januário Soares, husu autoridade suku sira atu motiva komunidade sira ne’ebé seidauk simu vasina, atubele partisipa másimu iha programa nasionál ne’e.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here