Diretór Jerál MSSI, Rui Manuel Gago Exposto. Imajen TATOLI/Francisco Sony

DILI, 12 outubru 2021 (TATOLI)—Ministériu Solidaridade Sosiál no Inkluzaun (MSSI) iha semana ne’e nia laran sei halo transferénsia fundu subvensaun públika tinan 2021, ba instituisaun hamutuk 26 ho totál millaun $1,2.

Tuir Diretór Jerál MSSI, Rui Manuel Gago Exposto, antes ne’e iha instituisaun 30 mak hatama proposta ba ministériu atu hetan subvensaun no ekipa halo ona avaliasaun ba proposta, ne’ebé iha 29 mak prienxe kritériu, na’in-26 asina ona akordu ho MSSI, enkuantu tolu seluk sei hein asina akordu tuir mai.

“Semana-ne’e nia laran sira hetan ona transferénsia subvensaun,”  Diretór Jerál informa ba Agência TATOLI, iha ninia knaar fatin, MSSI Caicoli, tersa ne’e.

Prosesu ne’e la’o tarde tanba Diretór Administrasaun MSSI ne’ebé responsável ba programa ne’e, hafoin asina akordu ho benefisiáriu, liu semana rua nia lakon vida (mate), nune’e Ministra Solidaridade Sosiál no Inkluzaun, Armanda Berta do Santos, delega kompeténsia provizóriu ba Diretór Jerál MSSI atu asume responsabilidade hodi bele kontinua no ezekuta programa.

Institusaun Solidaridade Sosiál ne’ebé hetan fundu hosi MSSI, prienxe rekezitu bazeia ba dekretu lei númeru 25/2017 kona-ba rejime jurídiku Instituisaun Solidaridade Sosiál, ne’ebé hateten katak instituisaun ne’ebé fó prestasaun servisu ba iha uma-mahon, orfonatu no ba ema ho defisiénsia, no seluk tan, tenke hetan utilidade sosiál hosi ministériu responsável.

Hafoin instituisaun sira hetan subvensaun, MSSI hamutuk ho Provedoria Direitu Umanu no Justisa (PDHJ, sigla portugés) no sosiedade sivil sei halo avaliasaun hodi hatene ezekusaun orsamentu ba programa no planu sira bazeia duni ba proposta ne’ebé instituisaun sira submete.

“Bainhihra ita halo monitorizasaun mak identifika sira ezekuta la tuir dalan, ita iha kompeténsia fó hanoin, nune’e bele ezekuta tuir dalan, enkuantu kona-ba sansaun, ita sei fó hanoin uluk, la halo tuir mak buka mekanizmu seluk. Monitorizasaun ita hala’o tinan ida dala-rua tanba orsamentu ne’ebé ita fó ba sira ba tinan-ida nian,” nia akresenta.

Instituisaun Solidaridade Sosiál 26 sei hetan subvensaun hosi MSSI mak hanesan Fundasaun Uma Paz Atu Serví hetan $29.317,12, Sentru Komunidade Kanosiana Saõ Miguel Lospalos, $22.565, Fundasaun Saõ José $45.528,26, Asosiasaun Halibur Defisiénsia Matan Timor-Leste, $63.296,58, Fundasaun Ahisaun $29.322.

Nune’e mós, ba FOKUPERS hamutuk $108.463,55, FOKUPERS Uma-Mahon Maria Tapo $43.406,97, Luzeiro Uma-Mahon Lospalos  $45.779,18, no Fundasaun Irmãs Reparadores Nossa Senhora de Fátima (Memo Maliana) $59.598, Sentru Sosiál Imaculada Conceição Lautém $43.306, Sentru Esperansa ba Feto $41.508,12, Klibur Domin $73.688,50, Fundasaun Knua Haberan Komunidade $30.083,32, Fundasaun Don Bosco Timor-Leste (Orfanatu Santa Terezinha Queliqai $46.925,84, Kongregasaun Institutu Sekular Alma $45.110,82, Fundasaun Don Bosco Timor-Leste (Orfanatu Saõ Paulo Lospalos) $47.356,48, Fundasaun Ordem Hopitaleira de. Saõ João de Deus Laklubar $70.416,80.

Fundasaun Kongregasaun Irmãs Dominicana de Santa Catarina de Sena Remexio $51.294,37, Sentru da Paz Santa Isabel Formação Integral Jovens Crianças Manatuto $34.924,20, Sentru Dezenvolvimentu Komunitária Madre Trindade Dilor Lakluta $52.014,55, Fundasaun Kongregasaun Irmãs Dominicana Santa Catarina de Sena Same $59.160,08, Centro de Kuidadu a Crianças Casa Vida $65.410,40, Asosiasaun Espesial Olimpik Timor-Leste $25.472,36, Kongregasaun Putri Maria no Yosep $32.877,51, Forum Komunikasaun Juventude Oratóriu Don Bosco $79.640,79 no Fundasaun Fraternidade Franciscana Divina Providencia Padeia Oé-cusse $75.752,14.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here