Progresu fíziku rekonstrusaun Gabiaun iha Nusla'o, Bobokase, atinje ona 70%. Imajen Agência TATOLI/Abílio Elo Nini.

OÉ-CUSSE, 12 outubru 2021 (TATOLI)— Projetu rekonstrusaun Gabiaun ne’ebé lokaliza iha bairru Nusla’o, aldeia Bihala, suku Bobokase, sub-rejiaun Pante Makasar atinje ona %70.

“Kontrolu seias, iha bairru Nusla’o ne’ebé implementa hosi empreza Lifau Indah, daudaun ne’e progresu fíziku atinje ona %70,” Diretór Rejionál Infraestrutura RAEOA, Candido dos Reis Amarál, informa ba Agência TATOLI, iha Santa Rosa, tersa ne’e.

Nia konsidera obra ne’ebé implementa hosi kompaia refere sei termina iha inísiu fulan-novembru tanba kompañia preparadu no garante kualidade.

“Ita hein katak empreza sira seluk ne’ebé kaer projetu rekonstrusaun Gabiau iha fatin seluk, bele haree no observa, ida-ne’e sai hanesan ezemplu ida, tanba lansa iha semana kotuk, ita haree iha semana ne’e atu konklui ona,” nia katak.

Nia esplika, serbisu flat kontrol ne’e importante tebes, tanba daudaun ne’e iha fatin balu foin mak lansa, balu hahú serbisu ona no balu besik finaliza ona.

Xefe suku Bobokase, Sebastião Cob, agradese ba autoridade RAEAOA ne’ebé tau-matan ba komunidade Nusla’o hamutuk uma-kain 67 ho totál populasaun 320, tanba dezastre naturál ne’ebé akontese iha 4 abríl liubá.

“Komunidade iha fatin ne’e uma-kain 67 hetan estragu ba uma, natar no to’os rai maran, tanba ne’e liuhosi Gabiaun ne’e bele laran-metin tanba besik udan monu-rai ona, nune’e labele repete tán estragu iha fatin ne’e,” nia akresenta.

Entretantu obra ne’e, lansa iha loron 28 setembru 2021 no ezekuta hosi empreza Lifau Indah Unipesoál, Lda, ho distánsia metru 300, ho valór kontratu hamutuk $151.203,25 no durasaun serbisu durante loron 120.

Autoridade RAEOA loke konkursu públiku ba projetu rekonstrusaun Gabiaun hamutuk unidade 20, ne’ebé kobre ba sub-rejiaun Oésilo, Nítibe no Pante Makasar ho montante orsamentu hamutuk millaun $2-resin ne’ebé aloka hosi Orsamentu Jerál Estadu (OJE) 2021 atu rekupera hikas área produtivu ne’ebé hetan estragu iha siklone tropikál seroja.

Jornalista: Abílio Elo Nini
Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here