Komandante PNTL Munisípiu Dili, Superintendente Xefe Henrique da Costa, Imajen/Tatoli.

DILI, 12 outubru 2021 (TATOLI)— Polisia Nasionál Timor-Leste (PNTL), liuhosi Komandu Munisipiu Dili, detein suspeitu na’in-haat ho insiál JB, MS, FMD no RDS tanba  komete  jogu ilísitu.

Komadante PNTL munisipiu Dili, Superintendente Xefe, Henrique da Costa, informa, ekipa investigasaun kriminál iha loron domingu (10/10), tuku 10:30 otl, kalan, halo operasaun hodi detein suspeitu sira tanba  hala’o hela atividade bola guling iha bairru Terra-Santa, aldeia BTM 3, suku Madohi, postu administrativu Dom Aleixo, munisípiu Dili.

“Ita nia ekipa investigasaun detein supeitu na’in haat tanba halo atividade bola guling, maibé laiha lisensa. Daudaun supeitu sira iha hela sela detensaun Komandu Munisipiu Dili hodi kompleta oras 72 atu aprezenta ba Ministériu Públiku,” Komandante PNTL munisípiu Dili ne’e hateten ba jornalista sira iha kna’ar fatin, Caicoli, tersa ne’e.

Polisia rekolla mós evidénsia hanesan osan, meza bola guling. Enkuantu supeitu sira mós tenta atu fó subornu ba ekipa PNTL ho osan $100.

Supeitu sira ne’e, kontra krime esplorasaun ba jogu ilístiu ne’ebé previstu iha artigu 322 iha kódigu penál.

Hosi artigu ne’e deskreve iha Alinea ida (1) katak, ema ne’ebé explora jogu fortuna ka azár iha fatin ne’ebé la’ós lei autoriza no laiha autorizasaun legál devida ka asegura sorte no erru, enganu laiha ekipamentu naran ida, sei hetan pena prizaun to’o tinan tolu ka multa.

Iha alinea rua (2), jogu fortuna ka azár maka sira ne’ebé iha rezultadu insertu tanba bazeia de’it ka liuliu iha sorte.

Jornalista: Natalino Costa

Editór: Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here