Departamentu Juventude Católica da Diocese de Díli (DEJUCDDIL) realiza kongresu ba dala-IV ho tema “Jovem Apóstolo ba Jovem”. Imajen Tatoli/Nelia Fernandes.

DILI, 12 outubru 2021 (TATOLI)-Diretór Komisaun Juventude Katólika Arkidioseze Dili (COJUCAD, sigla-portugés), Pe. João Soares, informa Departamentu Juventude Católica da Diocese de Díli (DEJUCDDIL) realiza kongresu ba dala-IV ho tema “Jovem Apóstolo ba Jovem” hodi halo revizaun ba DEJUCDDIL nia estatutu.

“Kongresu ida-ne’e atu halo fali revizaun ba estatutu. Tanba, ita hotu hatene uluk Dili sei hanesan Dioseze maibé oras ne’e Arkidioseze ona,” Pe. João Soares hateten ba Agência Tatoli, iha Salaun Retiru Dare, Dili, tersa ne’e.

Iha estatutu tuan ne’ebe tau Dioseze maibé oras ne’e Arkidioseze ona, nomós iha artigu balun ne’ebé estabelese iha estatutu tuan ne’e barak sei kontinua kontempla hela iha situasaun pastorál foinsa’e sira iha arkidioseze. Iha artigu balun ne’ebé halo fali revizaun hodi halo mudansa uitoan de’it.

“Ho kongresu ne’e, partisipante sira ativu tebes ho sira-nia kontribuisaun ideia. Ida-ne’e konsidera loos tanba atividade sira-ne’ebé Departamentu Juventude Katólika Arkidioseze halo ne’e, halo ba foinsa’e sira iha nível vigararia ba to’o iha parokia sira,” nia dehan.

DEJUCDDIL realiza kongresu ba dala-IV ho tema ‘Jovem Apóstolo ba Jovem’ ne’e, atu bolu fila-fali joven sira hodi konsensializa no motiva nafatin sira iha misaun nu’udar apóstolu.

“Ha’u sempre dehan ba joven sira, igreja ho Nasaun presiza ikatak imi katak imi mak esperansa no futuru ba Nasaun. Maibé, imi joven ho joven mak tenke tulun malu. Hatudu imi-nia sentidu solidaridade ba malu, buka tulun joven seluk atu hamrik hosi fatin hodi la’o ba buka Maromak no hodi la’o ba buka moris. Labele tuur bilan no labele tuur muron. Entaun, ida ne’e kna’ar apostolu nian,” amululik ne’e esplika.

Agora oinsá mak atu bele kontempla ‘Jovem Apóstolo ba Jovem’ ne’e, buat hotu-hotu kontempla iha estatutu no estatutu mak sei guia joven ida-idak oinsá atu bele sai jovem apóstolo ba jovem iha sira-nia aan rasik, família, komunidade, sosiedade, igreja no nasaun.

DEJUCDDIL halo revizauun ba estatutu tanba haree katak durasaun estatutu ne’e liu ona nia tempu, kuaze tinan 12 ona, no lahalo renovasaun entaun atu halo renovasaun prepara ekipa ida hodi fó formasaun no hafoin ne’e DEJUCDDIL haruka ba vigararia sira.

“Ekipa ne’e ba vizita joven sira iha vigararia hodi halo enkontru no fó formasaun ba joven sira atu komprende saida mak sei akontese iha kongresu ne’e. Nune’e, bainhira sira mai karik, la’ós ona hanesan buat foun maibé sira hatene ona katak sira mai hodi partisipa no kontribui,” Diretór ne’e hateten.

Nia dehan, liuhosi kongresu ne’e partisipante sira define no troka fali naran tuan DEJUCDDIL ne’e ba fali COJUCAD (Komisaun Juventude Katólika Arkedioseze Dili).

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here