Ministru Prezidénsia Konsellu Ministru, Fidelis Manuel Leite Magalhães, lansa kampaña nasionál vasinasaun, iha suku Holsa, postu administrativu Maliana, munisípiu Bobonaro. Imajen Agência TATOLI/Sérgio da Cruz.

BOBONARO, 12 outubro 2021 (TATOLI)— Komunidade suku Guda, postu administrativu Lolotoe, muníspiu Bobonaro %80 simu ona vasina tipu AstraZeneca hodi proteje-an hosi propagasaun surtu COVID-19.

“Ita-nia populasaun alvu ne’e totál 556 mak elijivel atu vasina. Hosi númeru ne’e 313 mak simu ona doze kompletu, falta de’it 100-resin mak seidauk, ne’ebé to’o agora ha’u-nia populasaun vasinadu hamutuk 80%” Xefe suku Guda, Caetano Francisco, informa Agência TATOLI, iha salaun administrasaun munisípal Bobonaro, tersa ne’e.

Autoridade lokál ne’e haktuir, hosi númeru ne’ebé mensiona hatudu katak, partisipasaun komunidade Guda ba iha programa governu ne’e másimu, tanba hetan ona informasaun ofisiál hosi Ministru Prezidénsia Konsellu Ministru, Fidelis Leite Magalhães no komunidade sira konsiente katak vasina importante ikus mai sira deside simu vasina.

“Ha’u hanesan autoridade lokál ho komunidade sira orgullu tebes ho prezensa Ministru Fidelis ne’ebé mai direita hasoru komunidade sira, hodi konsiensializa no fahe informasaun kona-ba efeitu hosi vasina Covid-19, atu salva komunidade nia vida hosi moras ne’e,” nia hatutan.

Xefe suku ne’e sei esforsa maka’as fahe informasaun ba komunidade ne’ebé seidauk vasina, atu hakbesik ba sentru vasinasaun ne’ebé besik, nune’e bele mitiga no elimina inimigu invizivel COVID-19 iha Timor-Leste.

“Hanesan autoridade lokál iha obrigasaun atu konvense populasaun sira, tanba ne’e ba oin sei nafatin koopera ho autoridade munisipál no parte saúde, atu nune’e ha’u-nia komunidade 100-resin ne’e mós bele simu kompletu,” nia hateten.

Entretantu dadus hosi Ministeriu Saúde hatudu katak, populasaun munisípiu Bobonaro hamutuk 27,278 mak simu ona doze dahuluk no kompleta doze hamutuk 14,399 ho totál %47.1 doze dahuluk no doze kompletu foin atinje %25,4.

Enkuantu haree ba persentajen vasinasaun iha nível nasionál, Bobonaro sei okupa terseiru lugár númeru kiikliu kompara ho munisípiu sira seluk.

Membru VIII Governu Konstituisionál na’in-haat mak hanesan, Ministru Prezidénsia Konsellu Ministru, Fidelis Manuel Leite Magalhães, responsabiliza postu administrativu Maliana no Cailaco, Ministru Edukasaun, Juventude no Desportu (MEJD), Armindo Maia, responsabiliza postu administrativu Bobonaro.

Nune’e mós Ministru Ensinu Superiór, Siénsia no Kultura, Longuinhos dos Santos, responsabliza postu administrarivu Cailaco no Ministru Agrikultura no Peska, Pedro dos Reis, responsabiliza postu administrativu Atabae no Balibo durante semana rua nia laran.

Jornalista : Sérgio da Cruz

Editor       : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here