Benefisiáriu sira hamutuk 422 iha suku Naimeco simu hela osan hosi MSSI. Imajen Agência TATOLI/Abílio Elo Nini.

OÉ-CUSSE, 12 outubru 2021 (TATOLI)— Governu liuhosi Ministériu Solidariedade Sosiál no Inkluzaun (MSSI), tersa ne’e ensera ona pagamentu ba benefisiáriu idozu-invalidés 422 iha suku Naimeco, sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA).

Xefe Departementu Solidariedade Sosiál no Inkluzaun RAEOA, Adelino Cau, informa pagamentu idozu-invalidés hahú iha 23 juñu hosi sub-rejiaun Nítibe, kontinua ba iha sub-rejiaun Pásabe no Oésilo, no ensera iha iha sub-rejiaun Pante Makassar.

“Ohin, ekipa tékniku sira halo pagamentu ikus ona iha suku Naimeco ba benefisiáriu 422 kompostu hosi invalidu na’in-rua no idozu na’in-420 hamutuk 422, no totál ein-jerál simu iha períodu primeiru hamutuk 6.471,” Adelino Cau, informa ba Agência TATOLI, iha Santa Rosa, tersa ne’e.

Nia esplika, loloos ne’e pagamentu konklui ona maibé tanba situasaun pandemia COVID-19, iha suku balu Governo aplika serka sanitária, implika movimentu ba sub-rejiaun sira, entaun suspende pagamentu, hanesan iha suku Naimeco ohin mak halo pagamentu hanesan enseramentu ba pagamentu idozu-invalidés ba períodu dahuluk 2021 nian.

Durante prosesu pagamentu la’o ho situasaun kontroladu tanba kooperasaun entre autoridade lokál hamutuk ho Ofisiál Polísia Suku (OPS) no BNCTL, iha terenu sempre iha liña komunikasaun di’ak.

Nune’e mós benefisiáriu sira mós kumpre regulamentu Organizasaun Mundiál Saúde (OMS) no Ministériu Saúde (MS) nian hodi uza máskara, fase-liman no distansiamentu sosiál, nune’e prevene-aan hosi moras COVID-19.

“Reklamante iha, balu dokumentu la-kompletu, balu iha problema ho família, entaun ida-ne’e ita sei suspende, depois maka sira sei simu ikus bainhira iha ona solusaun, no tuir dadus ekipa téknika sira mak sei anúnsia iha tempu badak tanba sei halo hela pagamentu, na’in hira maka seidauk simu ho razaun saida, atu nune’e Governu bele fó solusaun,” nia fundamenta.

Entretantu, totál benefisiáriu idozu-invalidés iha RAEOA ba tinan 2021, hamutuk 6.471 kompostu hosi sub-rejiaun Nítibe 1.286, sub-rejiaun Pásabe 733, sub-rejiaun Oésilo 1.394 no sub-rejiaun Pante Makassar 3.058.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here