Estrutura Asosiasaun Turizmu Relijiozu Timor-Leste, lee kompromisu iha ámbitu lansamentu asosiasaun, iha salaun Katedral, tersa (13/10). Imajen TATOLI/Egas Cristóvão

Dili, 12 outubru 2021–Estadu Unidu Amérika (EUA) liuhosi Ajénsia Dezenvolvimentu Internasionál (USAID, sigla inglés) ho programa hanaran ‘Turizmu ba Ema Hotu’, ajuda Governu Timor-Leste introdús Asosiasaun Turizmu Relijiozu Timor-Leste (ATRTL) ho objetivu atu harii turizmu relijiozu iha Timor-Leste.

Asosiasaun ne’e lansa hosi Ministru Turizmu, Komérsiu no Indústria, José Lucas do Carmo da Silva, no akompaña hosi estrutura asosiasaun, Reprezentante EUA no Misaun USAID inklui entidade relevante.

Diretór Misaun USAID Interinu, Harold Carey, apresia ba inisiativa ne’e no iha esperansa programa ne’ebé sei realiza bele la’o ho di’ak.

“Asosiasaun ne’e bele ajuda promove direitu umanu no respeitu ba diferensa sira, inklui konstrui respeitu hasoru liberdade no diversidade relijiozu, tanba ne’e hanesan misaun EUA ba Timor-Leste. Espera asosiasaun ne’e sei estimula oportunidade kriasaun kampu traballu ba foin-sa’e sira, lori prosperiedade ba komunidade iha rai laran tomak no ajuda Timor-Leste diversifika ekonomia,” Reprezentante USAID, hateten iha seremónia lansamentu asosiasaun iha Salaun Katedrál, tersa ne’e.

Molok lansa asosiasaun, líder relijiozu hosi Katólika, Protestante, Hindu, no Konghucu halo kolaborasaun serbisu ho USAID hodi hetan konkordánsia ruma.

Tuir Harold Carey, turizmu relijiozu aprezenta grande oportunidade ba dezenvolvimentu ekonomia, ho vizita númeru turista signifikante hosi nasaun viziñu sira.

Iha biban hanesan, Enkaregadu Negósiu Embaixada EUA, Tom Daley, kongratula Timor-Leste tanba iha ona Asosiasaun Turizmu Relijiozu ne’ebé lansa iha ámbitu aniversáriu ba da-XXII vizita Amu Papa São João Paulo II iha Timor-Leste iha tinan 1989.

Asosiasaun planeia aloka fundu 50% ba formasaun

Nune’e mós, Prezidente ATRTL, Padre Angelo Salsinha, apresia ba apoiu ne’ebé asosiasaun simu ona no komprometidu hosi asosiasaun ne’e sei harii dame ba ema hotu.

Prezidente Asosiasaun Turizmu Relijiozu Timor-Leste, Padre Angelo Salsinha. Imajen TATOLI/Egas Cristóvão

“Agradesementu wa’in ba Maromak ne’ebé fó kbiit tomak ba ekipa kompostu hosi Projetu USAID, Governu Timor-Leste no Asosiasaun Turizmu Relijiozu, ba sira-nia vontade, unidade no kompromisu atu serbisu hamutuk hodi rejista asosiasaun sai legál. Espesialmente, agradese ba projetu ‘Turizmu ba Ema Hotu’, ne’ebé akompaña ami iha prosesu tomak. Ha’u fiar katak ho esperiénsia ne’e, ami sei serbisu profisionál liután atu asegura asosiasaun nia sustentabilidade no bein estár iha futuru,” nia subliña.

Padre Angelo dehan, nia parte no ekipa traballu sei asegura serbisu profisionál no promove respeitu relijiaun tanba ATRTL elabora ninia planu estratéjiku bazeia ba sentimentu komun entre líder relijiozu sira ne’ebé reprezenta iha asosiasaun.

“Dezafiu ne’ebé asosiasaun enfrenta mak sensibilizasaun no atu serbisu hamutuk ba envolvimentu komunidade iha fatin hirak ne’ebé iha valór ba promosaun ba turizmu relijiozu, tanba ne’e asiasaun planeia atu aloka fundu hosi Governu Timor-Leste 50% hodi fó formasaun ba líder komunitáriu no foin-sa’e sira atu simu turista sira ho dignu,” nia akresenta.

Rejistrasaun ofisiál ba ATRTL hanesan sosiedade sivil iha jullu 2021, ne’ebé loke dalan ba asosiasaun hodi simu fundu $110.000 hosi Governu Timor-Leste atu suporta funsionamentu asosiasaun ne’ebé halo esforsu atu kaptura porsaun merkadu turizmu relijiozu mundiál, tuir Organizasaun Turizmu Mundiál Nasaun Unida, turista millaun 330 mak kada tinan vizita sítiu relijiozu sira iha mundu.

Projetu USAID ‘Turizmu ba Ema Hotu’ halibur líder grupu relijiaun oioin iha tinan 2018 atu harii grupu traballu ida hodi esplora poténsiál turizmu relijiozu no organiza konferénsia turizmu internasionál bazeia ba tema ‘Pás, Armonia no Fraternidade Dezenvolvimentu’.

Espasu tuir mai ba asosiasaun ne’e mak sondajen nasionál kona-ba atrasaun no ospitalidade turizmu relijiozu, inklui formasaun ba gia turístiku ba foin-sae sira.

Aleinde ne’e, membru asosiasaun halo ona diskusaun kona-ba planu no festivál turizmu relijiozu anuál atu kria jardín pás.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here