OÉ-CUSSE, 12 outubru 2021 (TATOLI)— Sentru Informasaun COVID-19 iha Rejiaun Administrativa Espesiál Oé-Cusse Ambeno (RAEOA), rejista kazu ativu na’in-haat (4) no rekupera ona hosi sala izolamentu hamutuk 332.

“Ohin, Sentru Informasaun COVID-19 iha RAEOA, rejista kazu ativu hamutuk haat (4), daudaun ne’e sira baixa hela iha sala izolamentu, Kliníka Kurasaun na’in-rua (2), no iha izolamentu Kitahara Mahata hamutuk na’in-ida (1), no auto-izolamentu ida (1) no rekupera ona hosi izolamentu hamutuk 332,” Sekretáriu Rejionál Asuntu Saúde, Manuel da Costa, informa ba Agência TATOLI iha Sikluli, Oé-Cusse, tersa ne’e.

Nia informa, daudaun ne’e pasajeiru sira-ne’ebé tama iha Oé-Cusse kumpre hela loron 14 iha kuarentena hamutuk 30, uma Dra.Catarina Anunu (1), kuarentena Eskola ETARO Masin 23, auto-izolamentu Fulolo rua (2).

Nune’e mós auto-kuarentena rezidénsia Mateus Sufa na’in-ida (1), auto-kuarentena Veronica Oématan na’in-ida (1), auto-kuarentena Palaban na’in-ida (1) no auto-kuarentena Ótel Lifau ida (1).

Tuir dadus hosi 23 marsu 2020 to’o 12 outubru 2021, totál dadus komulativu kazu konfirmadu hamutuk 339, hasai teste-swab 510, númeru RDT swab 232, komulativu teste-swab 3.833, komulativu rezultadu negativu 3.566. Dadus pasajeiru ne’ebé kumpre kuarentena obrigatóriu 1.784, auto-kuarentena 312, totál 2.096 no pasa ona loron-14 hamutuk 2047 no rejista óbitu tolu.

“Situsaun iha Oé-Cusse kontroladu númeru komesa tún ona. Ita espera bainhira númeru laiha atividade hotu-hotu bele hala’o ona, hanesan merkadu normál, igreja, edukasaun inklui serimónia kulturál,” nia tenik.

Jornalista            : Abílio Elo Nini
Editór                    : Evaristo Soares Martins

PUBLISIDADEiklan