CNE hala'o edukasaun sívika ba estudante Universidade Dili (UNDIL) kona-ba ‘Promove Esklaresimentu aktu elitorál no elisaun ne'ebé reziliente iha situasaun COVID-19’ iha salaun UNDIL, tersa (12/10). Imajen Tatoli/Francisco Sony.

DILI, 12 outubru 2021 (TATOLI)—Komisaun Nasionál Eleisaun (CNE-sigla portugés), tersa ne’e hala’o edukasaun sívika “Promove Esklaresimentu kona-bá Aktu Eleitorál no Eleisaun ne’ebé Reziliente ho COVID-19” ba estudante Universidade Dili (UNDIL).

Prezidente Komisaun Nasionál Eleisaun (CNE-sigla portugés), José Agostinho da Costa Belo, hateten CNE halo edukasaun sívika ba sidadaun sira maibé hili sidadaun akademiku hanesan Universidade Dili, tanba estudante barak mak atinje ona idade 17 no sira mós iha direitu votu iha eleisaun Prezidensiál no parlamentár.

Notísia Relevante: Eleisaun prezidensiál 2022: Sentru votasaun 1200 no paralelu tolu

Prezidente CNE, José Agostinho da Costa Belo. Imajen Tatoli/Francisco Sony.

“CNE no STAE sente iha responsabilidade boot atu konsensializa ita-nia sidadaun liu-liu estudante sira, nune’e sira partisipa iha eleisaun ne’e no iha kontribuisaun ba demokrasia. Agradese tanba parte Universidade Dili simu ami ho di’ak no estudante sira antuziasmu tebes atu tuir,” José Agostinho da Costa Belo hateten ba jornalista sira, iha Salaun UNDIL, Dili, tersa ne’e.

Nune’e mós, Sekretáriu Tékniku Administrasaun Eleitorál (STAE) no CNE hamutuk ho Parlamentu Nasionál (PN) agora daudauk halo mudansa ba alterasaun lei eleitorál ba Prezidente Repúblika no Parlamentu Nasionál aprova ona atu aplika sentru votasaun paralelu iha eleisaun prezidensiál 2022.

“Sentru votasaun paralelu katak, estudante sira-ne’ebé mai hosi Oé-Cusse no mai hosi fatin dook, sira lalika preokupa ona tenke fila-fali ba sira-nia rain. Maibé, bele ona rejistu no vota iha Dili. Sentru votasaun paralelu ne’e iha sentru tolu mak ida sei estabelese iha parte leste, ida iha sentru (klaran) no ida seluk iha parte oeste, nune’e bele fasilita estudante sira atu fó sira-nia votu ho dignu,” nia dehan.

Entretantu, Komisária Komisaun Nasionál Eleisaun (CNE-sigla portugés), Odete Maria Belo hateten atividade edukasaun sívika ne’e CNE planea ona hodi realiza iha munisípiu Dili no territóriu tomak.

Komisária Responzavel Komisaun Nasionál Eleisaun (CNE-Sigla Portugés) Munisípiu Dili, Odete Maria Belo. Imajen Tatoli/Francisco Sony/

“Atividade ida-ne’e sei la’o to’o iha dezembru 2021. Ninia objetivu mak atu divulga informasaun kona-bá lei ligadu ho aktu eleitorál sira hanesan lei eleisaun prezidensiál no lei resensiamentu eleitorál. Ida-ne’e, ami divulga ba eleitór sira-ne’ebé mak atinje ona idade (tinan) 17 ba leten, atu nune’e sira prepara aan hodi bele tuir eleisaun prezidensiál 2022,” nia hateten.

Atividade ida-ne’e, CNE nia trajetu ba iha estudante Universidade sira no tuir planu sei halo atividade hanesan iha Universidade Orientál Timor Lorosa’e (UNITAL).

Tanba, estudante sira tenke hatene kona-ba alterasaun lei eleitorál Prezidente Repúblika nian ho lei anterior hateten katak ema tenke vota tuir ninia unidade jeográfika katak ema sira-ne’ebé hela iha munisípiu tenke fila-fali ba munisípiu atu tuir eleisaun.

“Lei foun ida agora ne’e, prioridade ba estudante no funsionáriu sira katak iha tempu eleisaun sira labele fila ba sira-nia rain no sira bele vota iha Dili, liuhosi sentru votasaun paralelu ne’ebé espesiálmente estabelese iha Dili de’it. Ami divulga informasaun ne’e ba estudante sira, atu sira bele hatene kle’an, nune’e besik eleisaun karik sira labele preokupa hodi ba fali iha munisípiu,” nia dehan.

Atu Evita labele vota dobru, nia dehan, bainhira ba vota ne’e uza de’it kartaun eleitorál no iha loron 50 ne’e, bele fó biban ba STAE atu elemina eleitór sira-ne’ebé mak rejistu sira-nia naran hodi vota iha Dili.

Asuntu seluk, CNE divulga informasaun kona-ba alterasaun lei resensiamentu eleitorál ne’ebé haktuir katak bainhira atu ba rejistu ne’e presiza de’it dokumentu tolu hanesan Billete Idenidade (BI), Kartaun Eleitorál no Pasaporte, ne’ebé iha tempu besik CNE sei aplika.  

Vise-Reitór III Universidade Dili UNDIL, Hugo Lorenço da Costa. Imajen Tatoli/Francisco Sony.

Vise-Reitor III Asuntu Estudantil, Hugo Lorenço da Costa, hateten atividade edukasaun sívika ne’e importante tanba universitáriu sira-ne’e hosi semestre foun sira-ne’ebé foin ramata sira-nia estudu iha nível sekundária no agora sira kontinua estudu iha UNDIL.

Agora, sira hirak ne’e idade foin 16 to’o tinan 18 no maioria balun foin mak tama ba iha primeiru etapa oinsá mak atu ezerse sira-nia direitu votu iha eleisaun prezidensiál 2022 no eleisaun parlamentar ne’ebé sei mai.

Programa ida-ne’e pozitiva ba estudante sira, oinsá mak atu hasa’e sira-nia koñesimentu atu uza sira-nia votu polítika ho responsabilidade nomós ho konsiénsia ne’ebé mak loos no momoos.

“Se lae, estudante sira la hatene katak votu ne’e to’o ba naran tuu de’it. Maibé, sira lahatene katak konsikuénsia hosi votu ne’e, bainhira hili sala, bele prejudika dezenvolvimentu nasaun nian no konstrusaun Estadu ne’e ba oin.

Entretantu, estudante sira-ne’ebé partisipa ba atividade ekusaun sívika ne’e kuaze 200-resin, kompostu hosi fakuldade neen (6) hosi departamentu 13 iha Universidade Dili.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here