Ekipa RAEOA inklui Prezidente Autoridade, Arsénio Paixão Bano, segunda ne’e lansa ona fatuk-dahuluk ba projetu rekonstrusaun Gabiaun iha suku Naimeco. Imajen Agência TATOLI/ Abílio Elo Nini.

OÉ-CUSSE, 12 outubru 2021 (TATOLI) — Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hatuur fatuk-dahuluk ba projetu rekonstrusaun gabiaun iha mota Nunu-Teke, aldeia Teina’e, suku Naimeco, sub-rejiaun Pante Makasar.

Arsénio Bano, informa, projetu rekonstrusaun gabiaun ne’e nu’udar asaun konkreta hodi responde ba siklone tropikál seroja ne’ebé akontese iha iha 4 abríl liubá, ne’ebé sobu no estraga área produtiva natar no to’os.

“Iha tinan ne’e, autoridade loke tenderizasaun ba projetu rekonstrusaun iha fatin 20. Ida-ne’e intensaun hosi autoridade atu responde imediata ba fatin-ne’ebé risku ba dezastre naturál akontese iha 4 abril liuba, presiza tau atensaun prepara kondisaun antes udan monu-rai,” Arsénio Paixão Bano, ko’alia iha ámbitu lansamentu iha aldeia Teina’e, suku Naimeco, segunda ne’e.

Projetu rekonstrusaun gabiaun sne’e iha suku Naimeco, maibé konstrui iha sub-rejiaun Oésilo hosi mota Noel-Ekat mai to’o mota sub-rejiaun Pante Makasar no hosi vila Pante Makasar to’o sub-rejiaun Nítibe, mota Noebesi no fronteira Citrana.

“Hakarak Oé-Cusse sai furak no sai ezemplu ba iha Timor-Leste, ha’u husu, ita tenke unidade ita serbisu rasik ba ita-nia rai Oé-Cusse, komunidade labele hamrook-tán bee-moos, komunidade lori nia produtu ba merkadu tenke asesu estraga di’ak. Ida-ne’e maka autoridade nia mehi lori dezenvolvimentu besik ba komunidade iha área rurál,” nia afirma.

Arsénio Bano enkoraja empreza sira tau implementa obra garante ho kualidade tuir padraun Estadu nian, tanba gasta osan Estadu nia benefísiu ba komunidade ba tinan barak.

Nia apela ba komunidade servisu hamutuk ho empreza nune’e bele finaliza obra ne’e iha tempu badak, tanba besik udan-monu rai, projetu rekonstrusaun ne’e bele preparadu ona.

Xefe suku Naimeco, Marcos Liu Abi, agradese ba autoridade RAEOA, tanba projetu rekonstrusaun ne’e sei rezolve komunidade uma-kain 100-resin.

Nune’e mós responde ona pedidu ne’ebé autoridade lokál sira iha suku Naimeco propoin, tanba dezastre naturál iha 4 abríl, afeta maka’as ba populasaun nia produtividade.

“Ami agradese tanba suku Naimeco presiza apoiu, tanba akontese dezastre iha tempu hirak liubá, área suku Naimeco hetan afetasaun maka’as, balu lakon natar no to’os, entaun mumentu ne’ebá autoridade husu apoiu emerjénsia, konsege apoiu foos, no ohin responde-tán ho projetu rekonstrusaun,” nia dehan.

Entretantu, Sekretáriu Rejionál ba Asuntu Agrikultura, José Eta, informa, projetu rekonstrusaun Gabiaun ne’e, ho distánsia metru 500, ne’ebé konstrui hosi empreza Asys Tono Unipesoál, Lda, ho valór kontratu $137.784.05, ho durasaun serbisu loron 120.

Nune’e mós iha suku Naimeco autoridade tau prioridade tanba iha siklone tropikál seroja, hetan afetasaun maka’as, nune’e maka autoridade aprova projetu rekonstrusaun hamutuk metru 2.750.

Entretantu, antes ne’e Autoridade RAEOA liuhosi Sekretáriu Rejionál ba Asuntu Agrikultura, identifika vítima ba siklone tropikál seroja iha 4 abríl liubá hamutuk uma-kain 904 mak falla kolleta, nune’e autoridade fornese foos saka ida kada uma-kain ida durante fulan haat, hahú hosi fulan-jullu to’o outubru tinan ne’e ho totál foos hamutuk saka 3.616.

Autoridade aloka millaun $2-resin hosi Orsamentu Jerál Estadu (OJE) 2021 hosi responde siklone tropikál seroja konstrui gabiaun hamutuk unidade 20 kobre ba área produtiva sira hosi sub-rejiaun Oésilo, Nítibe no Pante Makasar.

Notísia relevante: Autoridade RAEOA aloka millaun $2-resin ba rekonstrusaun gabiaun

Jornalista: Abílio Elo Nini
Editór: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here