Prezidente Konsellu Administrasaun APORTIL, Flávio Cardoso Neves. Imajen TATOLI/António Gonçalves

DILI, 12 outubru 2021 (TATOLI)–Autoridade Portuáriu Timor-Leste (APORTIL) halo esforsu normaliza konetividade via marítima, liliu viajen hosi Dili bá Rejiaun Administrativa Espesiál Oé-cusse Ambeno (RAEOA) no Ataúro.

“Prosesu aluga ró la’ós prosesu fasil tanba besik ona tinan ne’e ramata, maibé dala ruma ró mai mós labele hala’o atividade. Importante liu maka situasaun agora ne’e ita labele nonok de’it, ita hotu tenke pro ativu hodi solusiona problema ne’e, nune’e bele fó benefísiu ba povu,” Prezidente Konsellu Administrasaun APORTIL, Flávio Cardoso Neves, hateten ba Agência TATOLI, iha ninia knaar fatin, Portu Dili, tersa ne’e.

Daudaun ne’e, Ró Berlin Nakroma ne’ebé mak durante ne’e hala’o operasaun entre Dili bá Oé-cusse no Dili bá Ataúro, paradu tanba ró ne’e avaria no seidauk hadi’a to’o agora.

Notísia relevante: APORTIL deside empreza Timor Ocean halo manutensaun Ró Berlin Nakroma

Aleinde ne’e, Ró Success daudaun ne’e la halo operasaun tanba sei ba halo manutensaun iha Malázia.

Nune’e, foin lalais Governu liuhosi APORTIL deside hodi aluga Ró Tranship II hodi garante konetividade via marítima, maibé ikus mai mosu polémika nune’e autoridade deside haruka fila ró ne’e bá Indonézia.

“Espera katak Ró Berlin-Ramelau to’o duni tuir loron ne’ebé determina ona, maski nune’e APORTIL sei serbisu maka’as hodi buka alternativa konetividade via marítima,” responsável ne’e garante.

Ho situasaun sira ne’e, daudaun seidauk iha ró ida atu substitui tula pasajeiru sira.

Maski nune’e, Prezidente Autoridade APORTIL dehan, laiha hanoin atu aluga fali ró tanba prosesu aluga ró mós defisil no presiza tempu barak, maibé espera katak Ró Berli-Ramelau to’o Timor-Leste tuir tuir loron ne’ebé determina ona.

Atu solusiona problema konetividade marítima, APORTIL haruka ona karta ba Diresaun Nasionál Transporte Marítima (DNTM) hodi haree didi’ak Ró Samudra ne’ebé daudaun ne’e tula karga no Ró Ataúro Express bele tula mós pasajeiru no karga, maski kapasidade tula sasán no ema la boot, maibé depende ba diresaun ninia desizaun hodi fó lisensa.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here