Osan Dollar Amerikanu. Imajen/Espesiál

COVALIMA,  12   outubru 2021 (TATOLI)—Xefe Departamentu Reprezentasaun Territoriál Floresta no Planta Indústria Covalima, Francisco Sarmento, informa hahú hosi fulan-agostu to’o setembru tinan ne’e, Floresta Covalima kontribui ona reseita $850.00 ba kofre Estadu ne’ebè kobre hosi tipu lisensa sosiál no lisensa negósiu.

Nia hateten, tipu lisensa sosiál mak ajuda komunidade sira hodi fasilita konstrui uma adat no privadu, no tipu lisensa negósiu mak komunidade sira-ne’ebè mak loke negósiu hodi distribui aí ba iha Dili tenke hasai lisansa iha floresta liu-liu ai-teka ne’e tenke selu iha banku. 

“Ita foin fó lisensa no ami mós akompaña tula sira-nia ai kúbiku hira hodi halo kontajen transporta. Ai kúbiku ida ba negósiu selu $25.00. Tanba ne’e, hosi fulan agostu-setembru ne’e, ami konstribui ona reseita $850.00 ba kofre Estadu. Reseita ba fulan-agostu, komunidade tula ai kúbiku lima (5) selu $125.00 no iha setembru, komunidade tula ai 29 metru kubiku $7,25.00,” Francisco Sarmento informa ba Agência Tatoli iha Santa Rosa, Covalima, tersa ne’e. 

Aleinde ne’e, nia apela ba komunidade atu labele tesi ai iha área foho lolon, tenke kuidadu didi’ak tanba ai nia abut mak tahan rai, tanba bainhara tesi ai iha foho leten fó impaktu tebes ba komunidade tanba rai bele monu bainhira udan monu rai.

Ita tesi ai arbiru impaktu mak hamosu El Niño (anin no udan boot) hodi estraga ba ita-nia plantasaun hare no batar. Tanba, bailoron naruk hanesan iha rai balun manas to’o 40 to’o 45 grau selsiu. Ita tenke neutraliza,” nia dehan.

Entretantu, nia informa, dezafiu ne’ebè ekipa floresta Covalima hasoru mak laiha transporte ba korpu guarda floresta sira atu halo movimentu hodi halo patrullamentuu. 

Nia dehan, iha Timor-Leste, área floresta rezerva nasionál mak Postu Administrativu Tilomar no Parke Naasionál Nino Konis Santana iha Lautém-Lospalos.

Funsionáriu Serbisu Floresta Covalima hamutuk na’in-22, kompostu hosi tékniku florestál na’in-ida (1), guarda florestál na’in-12, tékniku planta indústria na’in-rua (2), tékniku agrokomérsiu na’in-rua (2) no cleaner na’in-ida (1).

Jornalista : Celestina Teles

Editór      : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here