iklan

COVALIMA

Zumalai seidauk ezekuta orsamentu programa mão de obra faze daruak

Zumalai seidauk ezekuta orsamentu programa mão de obra faze daruak

Administradór Munisípiu Covalima, Francisco de Andrade. Imajen Tatoli/Celestina Teles

COVALIMA, 11 outubru 2021 (TATOLI)—Administradór Munisípiu Covalima, Francisco de Andrade, informa úniku postu administrativu Zumalai seidauk ezekuta orsamentu implementasaun programa mão de obra ba faze daruak tanba transferénsia poder.

“Implementasaun programa mão de obra ba faze daruak, úniku postu administrativu Zumalai mak seidauk ezekuta tanba relasiona ho transferensia poder ho finansa anteriór no finansa agora,” Francisco de Andrade hateten ba Agência Tatoli, iha nia kna’ar fatin, segunda ne’e. 

Implementasaun programa mão de obra ba faze daruak, nia dehan, postu administrativu Zumalai mak seidauk ezekuta no seidauk haruka relatóriu ba iha Administrasaun Munisípiu Covalima. 

Nia informa, hafoin implementasaun programa mão de obra ne’e, Agência Fiskalizasaun hosi Administrasaun seidauk halo fiskalizaun hodi haree direta implementasaun ne’e, tuir duni planu no programa ka lae bazea ba programa ne’ebè mak aprezenta hosi kada postu administrativu. 

“Tuir ha’u-nia observasaun hodi haree direta implementa programa mão de obra iha munisípiu Covalima bazea ba planu no programa ne’ebè mak aprezenta hosi postu administrativu sira,” nia dehan.

Bazea ba relatóriu verbál ne’ebè administradór postu administrativu haruka mai iha administrasaun sira tau prioridade konstrui jardin iha administrasaun postu administrativu Zumalai.  

Razaun, nia dehan, tanba transferénsia poder no administradór postu administrativu mós haruka ona karta mai iha administrative, atu haruka halo aseitasaun nune’e banku belé halo transferénsia orsamentu ba finansa foun. 

Administradór Postu Administrativu Zumalai, Rui dos Santos, klarifika postu administrativu seidauk implementa programa mão de obra ba faze daruak, tanba tenke halo mudansa ba estrutura no konta bankaria. 

“Ami seiduak ezekuta orsamentu hodi implementa programa mão de ba faze daruak tanba sei hein desizaun hosi nível  nasionál hodi hatun orientasaun ba banku, autoriza ami belé foti orsamentu,” nia esplika. 

Programa mão de obra ba faze daruak, postu administrativu Zumalai kontinua konstrui jardin iha resintu postu administrativu Zumalai. 

Programa mão de obra foku liubá hadi’a estrada, hamoos valeta, kuda ai-funan no mós harii jardín iha edifísiu postu administrativu sira-ne’ebé orsamentu mai hosi orsamentu 2021 ba kada postu administrativu ho montante $50,000.00

Administrasaun Munisipál Covalima iha área luan 1,226 km², ho Postu Administrativu hitu (7), suku sira hamutuk 30 no aldeia 148, Postu Administrativu Zumalai mak iha suku barak liu kompara ho suku seluk iha Administrasaun Munisipál Covalima.

Notísia Relevante:

Jornalista : Celestina Teles

Editór       : Cancio Ximenes 

iklan
iklan

Leave a Reply

iklan
error: Content is protected !!