Ilustrasaun avaliasaun hakerek hosi alunu. Imajen/Nova Eskola

DILI, 11 outubru 2021 (TATOLI)Eskola Ensinu Báziku Filiál (EBF) númeru 04 Kuluhun hasoru difikuldade tanba profesór permanente na’in-lima reforma ona desde tinan 2015, maibé to’o agora seidauk iha substituisaun.

Koordenadór Eskola EBF númeru 04 Kuluhun, Domingos Magno, hateten, kestaun ne’e sira preokupa tanba Ministériu Edukasaun Juventude no Deporti (MEJD) seidauk substitui fali profesór ho esperiénsia hanesan profesór ne’ebé reforma ona.

“Ita-nia profesór permanente na’in-lima ne’e mesak iha esperiénsia de’it, ministériu koloka sira iha eskola ne’e atu ajuda hanorin labarik sira. Maibé tanba de’it fatór idade, sira tenki reforma, maibé to’o agora ita seidauk simu fali profesór foun atu substitui fali fatin ne’ebé mamuk,” Koordenadór Eskola dehan ba Agência TATOLI, iha ninia knaar fatin, eskola EBF Kuluhun, segunda ne’e.

Notísia relevante: Rekruta profesór 975, DRH-MEJD halo hela preparasaun téknika

Aleinde ne’e, eskola ne’e iha tan profesór na’in-hitu maka preparadu atu reforma tanba sira tama ona idade 60 bá leten.

“Sira aprezenta ona dokumentu ba Diresaun Rekursu Umanu Ministériu Edukasaun Juventude no Desportu, maibé seidauk iha despaixu. Ha’u la hatene sira na’in-hitu simu tan reforma, oinsá ho labarik 800 nia distinu iha eskola ne’e, tanba ita agora iha totál profesór hamutuk na’in 23, permanente 17, voluntáriu ualu no kontratadu hosi Governu lima,” nia informa.

Tuir Koordenadór Eskola, bainhira MEJD hatun ona sirkulár atu reforma ba profesór lima ne’e, tenki iha mós sirkular seluk atu halo fali rekrutamentu, atu nune’e bele iha balansu.

“Maibe ida-ne’e la akontese to’o agora, ne’ebé daudaun profesór voluntáriu prenxe hela fatin profesór permanente lima ne’e,” nia dehan.

Jornalista : Tomé Amado
Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here